Përfunduan zgjedhjet e parakohshme parlamentare në territorin e Bullgarisë. Sipas exit poll-it të Agjencisë Sociologjike “Alpha Research”, e cila është partner i Radios Kombëtare Bullgare, në parlamentin e ri të Bullgarisë do të hyjnë gjashtë parti politike. Partia GERB fiton rreth 32,2% nga votat, kurse kundërshtari i saj kryesor Partia Socialiste Bullgare – afro 28 për qind. Fuqia e tretë në parlamentin e ri do të jetë Lëvizja për të Drejtat dhe Liritë me 9,7 për qind nga votat. Në pozitën e katërt renditet Koalicioni nacionalist “Patriotë të Bashkuar” (Fronti Kombëtar për Shpëtim të Bullgarisë, Partia “Ataka” dhe VMRO) me mbështetje prej 9,5%. Partia “Volja” (Vullnet) e sipërmarrësit Mareshki është e pesta me 5,1 %, kurse në pozitën e gjashtë me 4% është koalicioni i së djathtas “Blloku i Reformatorëve – Zëri i popullit”.

Sipas “Alpha Research” pjesëmarrja në votime është 48,9%.

Sipas të dhënave të ndërmjetme të MPJ-së, jashtë shtetit kanë votuar afro 40 000 bullgarë, prej tyre afro 14 mijë zgjedhësve në Turqi. Për shkak të diferencës së madhe kohore, akoma nuk ka të dhëna për votimin në SHBA.

Nëse numërimi i fletëvotimeve i ripohon të dhënat e exit poll-it, GERB do të ketë 86-88 deputetë, Partia Socialiste Bullgare – 75-77, Lëvizja për të Drejtat dhe Liritë – 25-27, Patriotët e Bashkuar – 25-27, kurse për “Bllokun e Reformatorëve – Zëri i popullit” mbeten 10-11 vende në parlamentin e ardhshëm.