Politikanët bullgarë reaguan ashpërisht ndaj pohimeve të presidentit Vlladimir Putin se shkrimi sllav ka ardhur në Rusi nga trojet e Maqedonisë së sotme. Këtë tezë Putini e shpalli në Moskë në takimin e tij me homologun maqedonas Georgi Ivanov. Fjalët e tij ishin cituar në faqen e internetit të Kremlinit. Në lidhje me këtë ministrja e punëve të jashtme Ekaterina Zaharieva komentoi në Facebook se krijimi i shkrimit sllav është diçka që ka ndodhur sipas vullnetit dhe me pjesëmarrjen e shtetit bullgar dhe nuk është e rastit se mbreti Boris i Parë është përmendur në të gjitha librat e asaj kohe si Mbreti Boris – Mihail Pagëzori. Ajo kujtoi se para pesë vjetësh vetë patriku i Moskës dhe i tërë Rusisë Kirill tha, se shkrimi dhe librat janë sjellë në Rusi nga bullgarët. Zaharieva shtoi se “falë Bullgarisë alfabeti cirilik tashmë shihet në kartëmonedhat e valutës së përbashkët evropiane”. Ministri i kulturës Boill Banov tha se është tepër i befasuar me fjalët e Presidentit rus dhe kërkoi më shumë respekt ndaj historisë. Dje në një pritje solemne në Sofje me rastin e 24 majit – Ditës së shkrimit sllav dhe kulturës bullgare, Presidenti Rumen Radev tha se “shkronjat, gjuha dhe kultura janë shtëpia jonë e përbashkët”. Në lidhje me këtë festë të madhe bullgare Patruiku Neofit kreu një lutje për suksesin e të gjithëve që studiojnë dhe të gjithëve që merren me arsim, shkencë dhe kulturë. Në Sofje u zhvillua një paradë me pjesëmarrjen e Presidentit Rumen Radev, Kryetarit të Parlanemtir Dimitër Gllavçev, ministrave, shkencëtarëve nga Akademia Bullgare e Shkencave, profesorëve universitarë, dhe nxënësve. U vendosën kurora lulesh para monumentit të krijuesve të shkrimit sllav Shenjtorëve Kirill dhe Metodij, të cilët në vitin 1980 u shpallën nga Papa Gjon Pali II për mbrojtës të Evropës. Nesër një delegacion në krye me Presidentin Radev do të pritet në Vatikan nga Papa Francisk, kurse në Romë kreu i shtetit do të vizitojë vendet e shenjta bullgare – bazilikën “Shën Klemente”, në të cilën ndodhet varri i Shën Kirillit, kishën “Shën Pavel ala Regola”, e cila përdoret nga komuniteti bullgar në kryeqytetin italian dhe bazilikën “Santa Maria Magiore”, ku në shekullin e IX-të Papa Adrian II bekoi alfabetin bullgar, librat bullgare dhe veprimtarinë e vëllezërve të shenjtë Kirill dhe Metodij.