Për vit të radhës – më 24 mars, Bullgaria do të përfshihet në iniciativën Ora e Tokës e Organizatës Ndërkombëtare të Mbrojtjes së Natyrës WWF. E nisur si një ngjarje simbolike me shuarjen e dritave në Sidni gjatë vitit 2007, sot “Ora e Tokës” shënohet në më shumë se 180 shtete si një moment i ndarë botëror i solidaritetit për planetin.

”Dhe sivjet Ora e Tokës është shkak të mblidhemi për një orë  në errësirë /nga ora 20.30 deri në 21.30/, duke shuar dritat, që është një shprehje simbolike për kursimin e resurseve energjetike dhe për një konsum të arsyeshëm”, thotë në një intervistë për Radion Kombëtare Bullgare Vlladimir Ivanov nga WWF.

Fushata tek ne fillon nga Sofja, por me kalimin e kohës në të përfshihen dhjetëra komuna. Në Kopshtin e Qytetit të Sofjes do të zhvillohet ndodhia tanimë tradicionale Ora e Tokës me befasi, me shfaqje me zjarr dhe muzikë. ”Me kalimin e kohës, kjo ngjarje filloi të jetojë jetën e vet personale dhe bile nuk është e domosdoshme që të bëjmë përpjekje  për organizimin e saj. Njerëzit organizohen vetë, gjithashtu iniciohen dhe koncerte të tjera për Orën e Tokës. Ka dhe një sërë ngjarjesh të tjera, për të cilat nuk kemi informacion”, tregon me emocion Vlladimir Ivanov.

”Si gjithmonë fushata ka moton e vet. Për vitin 2018 ajo është “Lidhu me natyrën”, ve në dukje Vlladimir Ivanov. ”WWF mundohet të mendojë slogane interesante dhe sivjet është Connect to Nature. Organizata jonë është një bashkim i njerëzve të veçantë, të cilët lidhen në këtë botë gjithnjë e më virtuale përmes internetit. Prandaj e përdorim simbolin e lidhjes në logon e Orës së Tokës sivjet.”

Iniciativa është dhe shkak që të flitet për përpjekjet e ambientalistëve, të lidhura me ruajtjen e natyrës. Prandaj dhe Ora e Tokës ka një drejtim të ndryshëm në shtetet e ndryshme: ”Në Kolumbi njerëzit do t’i drejtojnë apel shtetit të angazhohet me zero shpyllëzime deri në vitin 2020, në Polinezinë Franceze pritet të pranohen veprime, që të mund të mbrohen 5 milionë kilometra katrore nga detet. Territoret detare janë vendet, të cilat vuajnë nga peshkimi industrial dhe nga ndotja e rëndë, prandaj është me një rëndësi të madhe që aty të ndërmerren veprimet e domosdoshme. Në Guatemalë do të punohet për ruajtjen e ujërave të ëmbla. Kjo po kështu është një temë e madhe, mbi të cilën Evropa sivjet do të punojë shumë seriozisht në nivel Komision Evropian, kurse WWF do të kryesojë fushatën për ruajtjen e ujërave të ëmbla, e cila do të startojë gjatë muajit qershor. Në Nepal organizata jonë do të mobilizojë fushatën për një energji të pastër rinovuese, e cila të arrijë deri të gjithë. Në fund të fundit, që të mund të ruajmë natyrën dhe larminë e saj biologjike, nuk është e mjaftueshme në kuadrin vetëm të 1 ore të shuajmë dritat. Duhet sistematikisht të flasim për dobitë nga natyra”, është kategorik Vlladimir Ivanov.

Përpiloi: Elena Karkallanova

Përgatiti në shqip: Nataniela Vasileva