Zëdhënësja e Përfaqësisë së përhershme të Bullgarisë në BE Genoveva Çervenjakova deklaroi se ambasadorët e të gjitha 28 shteteve anëtare të BE-së, në këtë numër edhe ai spanjoll, e kanë miratuar projekt-deklaratën, e cila duhet të pranohet gjatë Samitit Ballkani Perëndimor – Bashkimi Evropian gjatë muajit maj të këtij viti.

Dokumenti është miratuar javën e kaluar në Bruksel dhe u është dërguar shteteve të Ballkanit Perëndimor për konsultime. Pohimi i zonjës Çervenjakova përgënjeshtron informacionin e gazetës spanjolle “El Pais” se Madridi do të vendosë veto mbi projekt-deklaratën në fjalë, sepse Kryeministri Mariano Rajoy nuk dëshiron të vërë nënshkrimin e tij pranë atij të Kryeministrit të Kosovës.