Në deklaratën e vet në samitin e Procesit për Bashkëpunim në Evropën Juglindore në Slloveni Kryeministri bullgar Bojko Borisov deklaroi se perspektiva evropiane në regjion nuk ka alternativë, kurse Procesi për Bashkëpunim në Evropën Juglindore mbetet formati kryesor politik për një debat të ndershëm mbi çështjet e rëndësishme në regjion. Borisov përshëndeti Strategjinë e Komisionit Evropian për Ballkanin Perëndimor dhe gatishmërinë për fillimin e bisedimeve me Tiranën dhe Shkupin për anëtarësim. Ai nënvizoi se perspektiva evropiane duhet të jetë për të gjitha vendet e Ballkanit. Tani është momenti që vendet nga Ballkani Perëndimor të tregojnë vullnetin e tyre për zhvillim, theksoi Kryeministri bullgar. Në takimin bilateral me homologun e vet slloven Miroslav Cerar Borisov diskutoi mundësitë për thellimin e kontakteve ekonomike. Miroslav Cerar vuri në dukje se roli i Bullgarisë është kyç në përpjekjet mbarëevropiane për zgjidhjen e problemit të refugjatëve. Duke informuar për takimin e liderëve të zhvilluar gjatë marsit mes BE-së dhe Turqisë, Bojko Borisov theksoi se dialogu është vendimtar për përballimin e kësaj çështjeje dhe se marrëveshja e migracionit e BE-së me Turqinë duhet të respektohet.