Thesari i artë nga kryeqyteti i vjetër bullgar Presllav do të ekspozohet në Muzeun e Luvrit gjatë qershorit dhe kjo do të bëhet në kuadrin e programit kulturor të Presidencës Bullgare të Këshillit të Bashkimit Evropian.

Ekspozita është me moto “Epoka e mbretërve bullgarë” dhe theksi do të jetë mbi Shekullin e Artë të mbretit Simeon i Madh. Kuratori i ekspozitës Jannic Durand, i cili vizitoi muzeun në Veliki Presllav (Presllavi i Madh) për të zgjedhur eksponatet tha se muzeu ka koleksion shumë të vlefshëm dhe të pasur, që dëshmon për një etapë të rëndësishme prej zhvillimit të artit të tërë Evropës.

Thesari i Presllavit është gjetur rastësisht në vitin 1978. Me 120 stolitë e arta ose të lyera me ar, ai është një nga thesaret më të mëdha mesjetare. Ndër zbukurimet ka të tilla që datojnë që në periudhën e shekujve III-VII ka edhe sende nga shekulli i X-të. Një detal interesant në thesar është prania e simbolikës së krishtere. Sipas Jannic Durand ekspozitat që prezantojnë arritjet e kulturës bullgare në botë janë shumë të rëndësishme për imazhin e shtetit dhe vizituesit e tyre i vlerësojnë lartë.