Ballkani Perëndimor – prioritet i kabinetit “Borisov 3” edhe pas Presidencës Bullgare të Këshillit të BE-së

Foto: BGNES

Me veprimet e veta të fundit në politikën regjionale qeveria e Bojko Borisovit edhe një herë ripohoi se Ballkani Perëndimor mbetet prioritet në politikën e jashtme të Bullgarisë edhe pas përfundimit të Presidencës Bullgare të Këshillit të BE-së sipas parimit të rotacionit. Bisedimet e Borisovit një ditë më parë në Selanik dhe dje në mbrëmje edhe në Bosnjë e Hercegovinë jo vetëm se ripohojnë, por edhe konkretizojnë disa prej vijave kryesore të sjelljes së Sofjes në këtë sferë. Ky aktivitet ballkanik u shfaq nga qeveria mu para samitit të shtatë 16+1 në Sofje, qëllimi kryesor i të cilit është që të zhvillojë bashkëpunimin ekonomik dhe të rritë investimet e Kinës në Evropën Qendrore dhe Lindore, ku gjendet edhe Ballkani Perëndimor. Një prej fushave me prioritet të iniciativës këtë vit është infrastruktura, kurse projektet infrastrukturore ishin një temë dominuese gjatë vizitave të Kryeministrit Borisov në Selanik dhe Sarajevë.

Në takimin katërpalësh në Selanik midis kryeministrave të Bullgarisë, Greqisë, Rumanisë dhe Presidentit të Serbisë Kryeministri bullgar Bojko Borisov u kushtoi një vëmendje të posaçme çështjeve të infrastrukturës dhe të konektivitetit të transportit të regjionit. Tani ai e lidhi këtë temë me domosdoshmërinë që zhvillimi i sistemeve hekurudhore dhe i transportit detar dhe lumor të jetë i shoqëruar me përpjekje për lehtësimin maksimal të transportimit të mallrave përmes porteve. Teza e njëjtë u zhvillua suplementarisht edhe në Samitin e Selanikut të ministrave të transportit të katër shteteve, takim ky në të cilin pala bullgare informoi për gatishmërinë e vetë që nga fillimi i vitit 2019 të vendosë taksë elektronike për automjetet që lëvizin në autostrada. Vendi ynë bëri të ditur gjithashtu se është për arritjen e pajtueshmërisë operative të sistemeve për vendosjen e taksave për shtetet fqinje dhe ripohoi gatishmërinë për të punuar për ndërtimin e sa më shumë rrugëve dhe vijave hekurudhore, të cilat të garantojnë konektivitetin e transportit mes vendeve fqinjëve dhe të forcojnë lidhjet tregtare dhe ekonomike me to.

Përsëri këtë javë qeveria e Sofjes miratoi një Memorandum për krijimin e Këshillit Ekzekutiv për Korridorin Hekurudhor “Alpin-Perëndimor Ballkanik” për transportim mallrash. Kjo infrastrukturë gjithashtu ka qëllim ta përmirësojë konektivitetin dhe këmbimin e mallrave me vendet e Ballkanit Perëndimor. Sipas një vendimi të Komisionit Evropian që nga muaji mars i vitit 2018 korridori duhet të vihet në shfrytëzim në kuadrin e dy viteve, si pjesë e rrjetit hekurudhor evropian për transport të konkurrueshëm të mallrave.

Mirëpo, edhe në Selanik, edhe në Sarajevë Kryeministri Borisov rikujtoi një kusht kyç për integrimin evropian të Ballkanit Perëndimor. Në samitin katërpalësh në Selanik ai shënoi se ka nevojë për miqësi, kompromis dhe mirëkuptim mes të gjithëve në regjion, kurse në Sarajevë – se prioriteti Ballkani Perëndimor mbetet në fuqi, por vendet e këtij regjioni duhet t’i përballojnë dallimet e veta. Si shembull të përballimit të këtyre dallimeve Kryeministri Borisov shënoi Traktatin e Fqinjësisë së Mirë midis Bullgarisë dhe Maqedonisë, si dhe Marrëveshjen midis Athinës dhe Shkupit për emrin e Maqedonisë. Nëse këta shembuj do të përsëriten, kryesisht në marrëdhëniet e vështira midis Serbisë dhe Kosovës dhe në zgjidhjen e kundërshtimeve të brendshme në Bosnjë e Hercegovinë, kjo do të shihet në të ardhmen.

Përgatiti në shqip: Vesella Mançeva

Më shumë nga rubrika

Kosova 11 vjet pavarësi

“Ne, udhëheqësit e popullit tonë, të zgjedhur në mënyrë demokratike, nëpërmjet kësaj Deklarate shpallim Kosovën shtet të pavarur dhe sovran. Kjo shpallje pasqyron vullnetin e popullit tonë dhe është në pajtueshmëri të plotë me rekomandimet e të..

botuar më 19-02-17 8.50.PD

Sofja nuk shikon lidhje midis kazusit “Skripal” dhe helmimit të biznesmenit bullgar

Tanimë një javë me radhë opinioni publik në Bullgari është i shqetësuar me pohimet për një lidhje midis rastit “Skripal” në Britaninë e Madhe dhe provës së hetuar në Bullgari për helmimin e biznesmenit të armëve Emiljan Gebrev. Versioni u nis..

botuar më 19-02-12 2.35.MD

Marrëdhëniet mes Bullgarisë dhe Maqedonisë janë në kulmin e vet, por kundërshtimet historiko-ideologjike po mbeten

Më 4 shkurt një delegacion me në krye Kryeministrin e Maqedonisë Zoran Zaev, ishte në Bullgari për festimin e përbashkët të përvjetorit të 147-të të lindjes së Goce Dellçevit. Sipas pritjeve paraprake për vizitën në qendër të bisedimeve duhej të..

botuar më 19-02-05 3.58.MD