3 644 791 të huaj kanë vizituar Bullgarinë për 6 muajt e parë të vitit 2018. Kështu sivjet për periudhën janar-qershor vihet re një rritje prej 8,9% kundrejt së njëjtës periudhë të vitit 2017, tregojnë të dhënat e Institutit Kombëtar të Statistikave.

Vetëm për muajin qershor 2018 vizitat e turistëve të huaj tek ne shënojnë rritje 4,7 % në krahasim me të njëjtën periudhë të vitit të kaluar. Gjatë muajit qershor të vitit 2018 1 208 397 turistë të huaj kanë qenë në vendin tonë.

“Rritja e turizmit është e qëndrueshme dhe Bullgaria po afirmohet si një destinacion i preferuar, duke propozuar shërbim cilësor me çmime të arsyeshme. Për ne është shumë e rëndësishme që miqtë tanë të cilët e kanë parë vendin tonë për herë të parë, të kthehen përsëri”, komenton ministrja e turizmit Nikolina Angjellkova.

Më të shumta për gjashtë muajt e parë kanë qenë vizitat e bëra nga turistët nga Rumania – 575 609, që është rritje 21,1% kundrejt së njëjtës periudhë të vitit të kaluar. Më e madhe është rritja e numrit të turistëve nga Polonia – 38,4% dhe nga Izraeli – 27,6%.

Sipas ekspertit nga Instituti për analiza dhe vlerësime në turizëm Rumen Draganov për të gjithë Bullgarinë do të arrihet rritje prej 5,5% në numrin e turistëve. Kurse për periudhën korrik – gusht  vizituesit e huaj tek ne do të tejkalojë 2 milionë.

Përpiloi: Veneta Pavllova

Përgatiti në shqip: Nataniela Vasileva