Dita e Shën Trifunit shënohet nga Kisha Ortodokse Bullgare më 1 shkurt sipas stilit të ri. Në kalendarin folklorik festa e Trifunit zgjatet tre ditë me radhë, 1, 2 dhe 3 shkurt, të quajtura Trifunci.

Për popullin kjo është festa e Trifun Krasitësit dhe ajo është tepër e respektuar nga vreshtarët, kopshtarët dhe prodhuesit e verës. Disa konsiderojnë se festa bie më 1 shkurt, ashtu siç kremtohet nga kisha, ndërsa të tjerë më 14 shkurt, datë kjo e cila përputhet me Ditën e Shën Trifunit sipas stilit të vjetër kishtar.

Në studimet etnografike shenjtori krahasohet me hyjnitë Dionisij, Sabazij, Bakhus... Shën Trifuni respektohet edhe në shtetet e tjera ballkanike, ku konsiderohet ditë lidhur me ndërrimin e stinëve dhe kalimin nga dimri te pranvera. Kjo është një periudhë, e cila karakterizohet me karnavalet kushtuar ngjalljes së natyrës dhe hyjnive të lidhura me bereqetin. Në një dorëshkrim serb nga shekujt 16-17 theksohet, se këtë ditë të mbjellët duhet të spërkaten ne ujë të bekuar dhe të lexohet lutja e Shën Trifunit.

Tradita folklorike bullgare lidhet me krasitjen e parë të hardhive. Prandaj burrat frekuentojnë vreshtat, krasitin hardhitë dhe spërkatin me verë të kuqe.