Në takimin e ministrave të mbrojtjes të vendeve-anëtare të NATO-s që po zhvillohet në Bruksel Ministri i Mbrojtjes i Bullgarisë Krasimir Karakaçanov ripohoi angazhimin e vendit për të arritur parametrat për investime në mbrojtje, për të cilët u arrit marrëveshje gjatë 2014-ës në Uells. Plani i miratuar nga qeveria për rritjen e të ardhurave për mbrojtjen parashikon që deri në vitin 2024 ato të arrijnë 2 për qind prej Produktit të Brendshëm Bruto /PBB/ dhe 20 për qind e përmasës së tyre të përbashkët të jetë për armatosje të re, teknikë dhe studime shkencore. Gjatë 2018-ës shpenzimet për mbrojtjen përbënin 1.55 për qind prej PBB-së.

Në kuadrin e forumit Karakaçanovi u takua me Sekretarin e mbrojtjes të SHBA-së Patrick Shanahan, me të cilin ka diskutuar çështje të lidhura me projektin për blerjen nga ana e Bullgarisë të avionëve amerikanë luftarakë. Në takimin e tij me Ministren e mbrojtjes së Gjermanisë Ursula von der Leyen Karakaçanovi ka nënvizuar dëshirën e Bullgarisë për intensifikimin e marrëdhënieve dypalëshe në fushën e mbrojtjes – për rritjen e numrit të aktiviteteve të përbashkëta të forcave të armatosura të të dyja vendeve dhe për pjesëmarrjen e Gjermanisë në modernizimin e Ushtrisë bullgare.