Programi i ditës
Madhësia e tekstit
Radioja Kombëtare Bullgare © 2024 Të gjitha të drejtat janë të rezervuara

Tubimet dhe festivalet е gjallërojnë jetën në vendbanimet e vogla në Bullgari

Foto: Veneta Nikollova

Vera është në ecje të plotë dhe kjo është koha kur njerëzit udhëtojnë dhe rizbulojnë jetën në qytetet më të vogla. Me tubimet kushtuar traditave, zakoneve, gatimeve vendase apo thjesht me takimet familjare, ata mbledhin mysafirë nga vendi dhe jashtë. Por për t'u zhytur në përditshmërinë e banorëve vendas, duhet të bisedoni me ta, të njihni mënyrën e jetesës dhe të futeni në shpirtin e vendbanimit. Njerëzit rrallë janë me nxitim. Ata shijojnë takimet e rastësishme me njëri-tjetrin, ndalojnë dhe bisedojnë. Sa për turistët, vendasit janë më se të lumtur t'i udhëheqin në një restorant të mirë ose në atraksionet aty pranë.

Të tillë janë edhe banorët e qytetit malor të Panagjurishtes - shumë miqësorë dhe mikpritës. Qyteti ndodhet rreth 140 km larg Sofjes dhe historia e tij lidhet me heronjtë trima të Kryengritjes së Prillit (1876), të cilët dhanë jetën për lirinë e Bullgarisë. Shumica e monumenteve lokale u kushtohen atyre, dhe zona vizitohet nga turistët gjatë gjithë vitit.

“Këtë vit për herë të parë qyteti ynë priti Festivalin Ndërkombëtar të Fishekzjarrëve, erdhën njerëz jo vetëm nga vendi, por edhe nga jashtë. Kishte një interesim të madh.” - thotë Teodora Hristova nga Panagjurishte. Ajo është me profesion mësuese dhe në kohën e lirë punon në një qendër lokale informacioni:

“Ka ende afërsi mes njerëzve në qytetin e vogël, mblidhen nëpër shtëpi me fqinjët dhe miqtë, ndihmojnë njëri-tjetrin. Vetëm ai që nuk do, nuk mund të gjejë punë në një qytet si Panagjurishte, ku ka shumë ndërmarrje që punojnë dhe turizëm të zhvilluar. Ky është një vend ku nuk mund të mërzitesh. Këtu mund të vizitoni fshatin e afërt Banja, ose qytetin Strellça dhe burimet e tyre të ngrohta minerale. Nëse ju pëlqen ecja në male, si unë, duhet patjetër të ngjiteni në malin Bratija - 1516 m, ku mund të shihni Sofjen dhe Plovdivin në të njëjtën kohë. Aty pranë është shtëpia malore Buntovna, të cilën gjithashtu e vizitoj shpesh”.

Këtë verë një mundësi për takime mes njerëzve nga afër dhe larg dha Tubimi i Krijimtarisë Folklorike në Koprivshtica

Banorët vendas e prisnin festën me emocion, dhe shitësit е suvenireve nuk e fshehin se ngjarje të tilla inkurajojnë turistët të blejnë diçka për kujtim. Pllamen Petrov erdhi nga Veliko Tërnovoja për të ofruar suvenire, flamuj dhe bluza me simbole bullgare, të cilat janë gjithashtu shumë të kërkuara në Veliko Tërnovo.

Pllamen Petrov

“Kjo është hera e parë që vij këtu në Koprivshtica. Më pëlqen mjedisi dhe njerëzit që kanë ardhur. Mund ta ndjeni shpirtin e fortë bullgar dhe humorin festiv. Është mirë që tani ka më shumë udhëtime turistike të organizuara në tubime. Kështu ishte edhe gjatë Festivalit të Qershisë në Kjustendill

Ka interes për suveniret, edhe pse, çmimet janë rritur, si për të gjitha mallrat e tjera, karburantet janë shtrenjtuar gjithashtu. Njerëzit i kërkojnë dhe i blejnë, sidomos kur festat kombëtare po afrohen”.

Nga fshati Kallojanovo, rajoni i Plovdivit, në tubimin në Koprivshtica erdhi Stavri Stavrev, i cili shet kostume të vjetra popullore. Ai është përfaqësues i etnive në vend, por thotë se ka shumë dashuri për folklorin dhe traditat bullgare, madje i bie fizarmonikës dhe këndon këngë popullore që i ka mësuar që fëmijë. Për Stavrin, tregtia e kostumeve është edhe një mënyrë për të mbajtur familjen. Të dy djemtë e tij punojnë jashtë vendit:

Stavri Stavrev

“Shkoj nëpër fshatra dhe qytete dhe kërkoj dhe blej kostume popullore. Gjithçka është punuar me dorë, i qepnin natën nën dritën e qiririt. Ky është një thesar kombëtar që e mbledh prej mbi 20 vitesh. Por duhet të kesh dashuri për kostumet për t'i bërë ato. Kam kostume nga rajoni Smoljan, nga Gabrovoja, Pleven, nga e gjithë Bullgaria. Çmimet janë nga 100 leva /rreth 50 euro/ deri në 500 leva /rreth 250 euro/. Njerëzit në tubime kërkojnë të blejnë kostume popullore, por nuk kanë shumë para. Nuk më intereson vetëm fitimi, desha që njerëzit të jenë të lumtur. I dua edhe traditat. Pas Koprivshticës duhet të shkojmë në tubimin në Zheravna, të gjithë shkojnë atje për shkak të kostumeve”.

Përgatiti në shqip: Vesella Mançeva

Foto: Veneta Nikollova, Gergana Mançeva, panagyurishte.org, BGNES-arkiv




Последвайте ни и в Google News Showcase, за да научите най-важното от деня!

Më shumë nga rubrika

Në Vitosha hapet stina e dimrit

Mot me diell dhe i qetë pritet sot në malin Vitosha, ku edhe zyrtarisht do të fillojë sezoni dimëror, njofton Vitosha Ski në ueb faqen e saj. Organizatorët premtojnë surpriza të këndshme për mysafirët e malit. Pistat "Vitoshko Llale 1",..

botuar më 23-12-26 9.57.PD

Kushte të mira për shëtitje në male, por ka rrezik orteku vende-vende

Në malet kushtet për turizëm janë të mira, tha për BTA Tervell Totev, nga Shërbimi i Shpëtimit Malor. Megjithatë, ai paralajmëroi se për shkak të ngrohjes së ardhshme, rreziku i ortekëve do të rritet. Për këtë është mirë që njerëzit të mos ecin në..

botuar më 23-12-25 11.21.PD

Bashkitë e bregdetit jugor të Detit të Zi do të reklamohen së bashku në tregjet turistike të jashtme

Partnerët bashkiakë të qyteteve Burgas, Nesebër, Pomorie, Primorsko, Carevo dhe Mallko Tërnovo do të reklamojnë së bashku në tregjet në Poloni, Britaninë e Madhe, Republikën Çeke, Gjermani dhe vendet skandinave përmes videove tërheqëse dhe mesazheve..

botuar më 23-12-22 11.36.PD