Punimet e artistëve bashkëkohorë bullgarë me zërin, teknikën dhe mesazhet e tyre janë mbledhur në platformën virtuale të artit madein.bg. Qëllimi i galerisë online është të tërheqë vëmendjen ndaj krijimtarisë bullgare, për të cilën ia vlen të investohet, thonë krijuesit e saj.

“Sot tregu i artit në vendin tonë, sado i fragmentuar të jetë, nuk ka asnjë rregullim për sa i përket cilësisë së veprave të paraqitura, ai është i mbushur me riprodhime dhe kopje dixhitale të veprave origjinale, të cilat shpeshherë autorët i bëjnë vetë për të ofruar një alternativë më buxhetore ndaj krijimtarisë së tyre - thekson ekipi i galerisë online. Vetëm ata që dinë të reklamojnë veten ia dalin, duke e formuar veten si markë, pavarësisht nga arti i tyre.

Platforma do të ketë jo vetëm përfaqësues të rëndësishëm dhe shembuj të artit bullgar sot, por edhe artistë të rinj që sapo dalin në skenë. Zhanret e përfaqësuara në galerinë virtuale përfshijnë piktura, skulpturë dhe qeramikë, si dhe art dixhital, fotografi, objekte dizajni dhe bizhuteri.

Përpilues: Darina Grigorova

Përgatiti në shqip: Kostandina Bello