Krishtlindja – në shtëpi, Viti i Ri – në botë: udhëtimi i madh filloi

Këtë vit kalendari i festave na sjell një dhuratë të vërtetë — pesë ditë pushimi rreth Krishtlindjes dhe edhe pesë të tjera rreth Vitit të Ri, pra gjithsej dhjetë ditë pushimi. Kjo jo vetëm që është një lajm i mirë për sektorin tonë turistik, por edhe një mundësi për shumë njerëz që të “shkëputen nga zinxhiri” dhe të rimbushin bateritë. Një pauzë e tillë është më shumë se e përshtatshme — 2026-a do të nisë “me vrull” që në ditët e para me hyrjen në Eurozonë në sfondin e situatës politike të paqëndrueshme. Prandaj edhe rezervimet për festat nisën që nga vera, gjë që tregon se bullgari planifikon me kujdes. Dhe ndërsa Krishtlindja mbetet kryesisht një festë familjare, të cilën shumica preferojnë ta kalojnë në shtëpi, në një shtëpi mysafirësh ose në një resort bullgar, për Vitin e Ri atmosfera është tjetër – me sy të kthyer drejt destinacioneve të huaja, të afërta e të largëta, të njohura ose ekzotike, mësojmë nga Pavlina Ilieva, kryetare e Bashkimit “E ardhmja për turizmin”.

"Ndër destinacionet më të preferuara, nëse fillojmë këtu në zonën përreth nesh, janë, për shembull, Turqia. Ka programe fluturimesh - fluturime çarter për në Antalia ose Stamboll. Sigurisht, zgjidhen edhe vendet e tjera fqinje, si Serbia dhe Greqia. Por destinacionet e largëta, ndoshta, mbajnë kampionatin për Vitin e Ri, si dhe udhëtimet me anije. Ka një kërkesë të madhe për Detin Mesdhe, Karaibet, Tajlandën, Maldivet, Sri Lankën, etj. Ka edhe shumë rezervime për vendet evropiane." 

Ndryshe nga Viti i Ri, bullgarët po preferojnë të qëndrojnë në shtëpi për Krishtlindje, ndërsa vendet e lira në resortet dhe fshatrat turistike të njohura bullgare tashmë po shterojnë. Rezulton se shtëpitë dhe hotelet më të kërkuara janë rezervuar që në maj dhe qershor – përfshirë edhe nga kompani që kishin planifikuar paraprakisht ngjarjet festive, mësojmë nga Pavlina Ilieva.

Dhe si reagon turisti bullgar ndaj inflacionit dhe hyrjes sonë të afërt në Eurozonë? 

"Do ta përkufizoja si një shqetësim që lidhet me periudhën e janarit, pra me futjen e dy monedhave, përdorimin e tyre në janar - njerëzit janë paksa të shqetësuar për këtë periudhë udhëtimi. Edhe pse udhëtarët e kanë përdorur euron prej kohësh dhe realisht asgjë e re nuk do të ndryshojë për ta, ndjenja e pasigurisë po mbetet. 

Në praktikë, vetëm kartëmonedha ndryshon - thjesht fizikisht, vizualisht. Shumica e njerëzve që udhëtojnë operojnë me monedha të ndryshme dhe një ndryshim i tillë nuk duhet të krijojë ndonjë shqetësim të veçantë. Por shfaqet një lloj tjetër tensioni - ekonomik. Frika nëse çmimet do të rriten, nëse procesi do të nxisë inflacionin. Ky lloj shqetësimi është plotësisht i natyrshëm dhe është i pranishëm tek shumica e njerëzve në momente të tilla kalimtare", thotë Pavlina Ilieva. 

Çmimet e paketave të pushimeve janë rritur me rreth 6-7% krahasuar me vitin e kaluar, gjë që konsiderohet një rritje e moderuar në nivel global dhe nuk është aq stresuese, duke pasur parasysh parashikimet për rritje prej 10-15% që nuk u realizuan. Sa i përket vetë udhëtimit, shumica e paketave të pushimeve përfshijnë transportin - autobus, fluturim të rregullt ose çarter, varësisht nga destinacioni. Dhe më shumë: 

"Klienti do të ketë të përfshirë transferin, nëse është i nevojshëm, nga avioni deri te hoteli. Do të ketë akomodim në hotel, sigurim mjekësor dhe një udhërrëfyes nga agjencia. Këto janë gjëra standarde që përfshihen në një paketë. Tani ka oferta shtesë për natën e Vitit të Ri në varësi të destinacionit. Për shembull, në shumicën e qyteteve evropiane njerëzit e presin Vitin e Ri në shesh, kështu që pas orës 22:00 turistët do të përfundojnë me darkë dhe do të dalin për një festë të përgjithshme. Dhe ata që janë në vende si Egjipti, Tunizia dhe Antalia, etj., janë në hotele dhe në përputhje me rrethanat akomodimi është gjithëpërfshirës (all inclusive). Darka shndërrohet në një atmosferë festive dhe vazhdon deri në agim", përfundon Pavlina Ilieva.

Lexoni më shumë për udhëtimet në festat e fundvitit një vit më parë në arkivin tonë:

• Nga një përrallë dimërore deri në brigjet ekzotike – pik i udhëtimeve për festat e fundvitit - Radio Bullgaria në gjuhën shqipe

Përgatiti në shqip: Vesella Mançeva