Një film paraqet ritualet e gjalla të Evropës në Pernik

Më 22 janar, Perniku do të jetë mikpritës i një shfaqjeje të veçantë të dokumentarit “Shpirti i Lojërave të Maskaradës”, realizuar nga regjisorja bullgare Rosica Llazarova, e cila prej vitesh jeton dhe punon në Itali. Ngjarja është pjesë e programit të Festivalit Ndërkombëtar “Surva”, i cili këtë vit zhvillohet nën kujdesin e UNESCO-s. Me këtë rast, së bashku me autoren e filmit, në Bullgari mbërrijnë edhe përfaqësues të Festivalit Evropian të Maskave Zoomorfe në qytetin italian Isernia – z. Ferri dhe z. Gioielli. 

“Shpirti i Lojërave të Maskaradës” është realizuar sipas programit të Ministrisë së Arsimit dhe Shkencës “Historitë e patreguara të bullgarëve”.  

Në të, Llazarova bashkon dy tradita të rëndësishme maskaradash – “Surva”-n e Pernikut dhe Karnavalin Evropian të Maskave Zoomorfe në Isernia, në rajonin Molise – një zonë që lidhet me praninë historike të bullgarëve në Itali që nga koha e Khan Alcekut. 

• Celle di Bulgheria – për bashkësinë italiane me zemër bullgare dhe për lidhjet e saj me Bullgarinë

Filmi ka fituar tashmë çmime ndërkombëtare – Çmimin e Publikut në Festivalin Ndërkombëtar “Oko” dhe një vend ndër 5 më të mirët midis 130 filmave në Festivalin “Fiorenzo Serra” në Sardenjë – njohje e rëndësisë së tij kulturore dhe dokumentare.

Survakarët shumëngjyrësh dhe të zhurmshëm, kukerët, babugerëti dhe mamutonët kanë emra të ndryshëm në rajone të ndryshme evropiane, por ajo që kanë të përbashkët janë maskat e frikshme. Roli i tyre është të largojnë të keqen dhe të mbrojnë pjellorinë. Filmi gjurmon simbolikën e lojërave me maskaradë – nga ritualet e lashta për bujqësinë dhe ringjalljen e natyrës deri te mbrojtja nga kaosi – dhe thekson fuqinë e tyre universale për të bashkuar komunitetet dhe brezat në hapësira të ndryshme kulturore. Autorja e filmit pohon se një nga sfidat më të mëdha për të ishte pjesëmarrja e 27 fëmijëve nga Shkolla Bullgare e së Dielës "Abagar" në Romë, Ladispoli dhe Nettuno.

"Si historiane, më është dashur të përqendrohem edhe në prezantimin shkencor të lojërave me maskarada, në historinë e tyre si pjesë e trashëgimisë kulturore evropiane", thotë Llazarova. Mesazhi i të gjithë krijuesve dhe pjesëmarrësve në film është se duhet të besojmë te të rinjtë, te energjia dhe idetë e tyre, dhe t'u japim atyre mjetet dhe mundësitë për të ndërtuar një Evropë më të drejtë dhe më të begatë."

Shfaqja e "Shpirtit të Lojërave të Maskaradës" do të zhvillohet nga ora 18:00 më 22 janar në Pernik me ftesë të Festivalit Surva dhe do të bashkojë ambasadorët kulturorë bullgarë dhe italianë të një tradite evropiane të gjallë, të zhurmshme dhe ende shumë aktive.

 

Përpiloi: Veneta Nikollova

Përgatiti në shqip: Vesella Mançeva