Afati i fundit për shtetasit e BE-së që jetojnë në Mbretërinë e Bashkuar për të siguruar statusin e qëndrimit është 30 qershori. Pas kësaj date ata do të humbin një numër përfitimesh sociale dhe aksesin në shërbime të ndryshme në të gjithë Mbretërinë e Bashkuar. Rreth 300 000 evropianë kanë paraqitur tashmë aplikacionet dhe dokumentet e nevojshme, por ende janë duke pritur një përgjigje.
Bullgari Nishan Xhingozjan që prej vitesh banon dhe punon si nëpunës bashkiak në Mbretërinë e Bashkuar. Ai është themeluesi i Qendrës Bullgare për Integrim Social dhe Kulturë, përmes së cilës ndihmon bashkatdhetarët që kalojnë një periudhë të vështirë përshtatjeje dhe orientimi në kornizën administrative dhe legjislative në vend. Sipas fjalëve të tij, statusi i qëndrimit është i detyrueshëm për të gjithë shtetasit e BE-së që janë vendosur në Mbretërinë e Bashkuar, sepse pa të ka rrezik të deportohen, megjithëse ende nuk ka vendim dhe udhëzime konkrete për një masë të tillë:
"Ne tashmë ishim dëshmitarë të një skandali të madh të lidhur me shumë qytetarë të komunitetit Afro-Karaib të cilët kanë jetuar në Britani për 30-40 vjet. Ata u dëbuan, kështu që ekziston frika se mund të ndodhë një skandal i dytë i tillë, "shpjegoi Xhingozjan në një intervistë për BNR.
Ai është kategorik se deportimi i grupeve prej bullgarësh nga Mbretëria ka potencialin të bëhet një problem serioz për vendin tonë, pasi sistemi social nuk do të jetë në gjendje të përballet me problemin e madh të të papunëve.
"Që prej kohësh duhej të fillonte një fushatë informacioni, drejtuar bullgarëve në Britaninë e Madhe, fushatë kjo e cila nuk u realizua, " vuri në dukje bashkatdhetari ynë. - Ajo duhej t'u shpjegonte atyre se çfarë të drejtash dhe detyrimesh do të kenë pas Brexit. "
Një hollësi e rëndësishme në lidhje me dokumentin e qëndrimit të lëshuar nga autoritetet është se ai nuk është në letër.
"Të gjithë të cilët tashmë e ka marrë duhet të provojnë ekzistencën e tij. Ata nuk do të marrin një dokument fizik ose vulë në pasaportën e tyre, pasi dokumenti është vetëm digjital. Ky është një problem i madh për bullgarët në Britani. Apeli im është që ata së pari të aplikojnë dhe pastaj të njihen me hapat e nevojshëm për ta provuar këtë status."
Bashkatdhetarët tanë nuk duhet të kenë besim tek këshilltarët e palicensuar të emigracionit. Çdo person që ushtron një profesion të tillë duhet të jetë regjistruar në një listë të veçantë, e cila azhurnohet rregullisht nga Ministria e Brendshme Britanike.
Përpiloi: Joan Kolev /intervistë: Polja Stançeva/
Përgatiti në shqip: Vesella Mançeva
