Pas konsultimeve politike të Presidentit me forcat parlamentare para se të fillojë dorëzimin e mandateve për krijimin e qeverisë së re në kuadrin e këtij Kuvendi, pritjet për një qeveri të tillë duken si një iluzion. “Kundër” janë jo vetëm formacionet më të mëdha – GERB dhe Partia Socialiste Bullgare, por edhe Lëvizja për të Drejtat dhe Liritë, koalicioni i djathtë Blloku i Reformatorëve dhe partia e majtë ABV. “Pro” një qeverie në kuadrin e Parlamentit të tanishëm janë Fronti Patriotik, Qendra Demokratike Bullgare – Bashkimi Kombëtar, dhe partia nacionaliste “Ataka”. Mirëpo këto parti dinë se nuk mund vetë të formojnë qeveri, sepse deputetët e tyre janë 42 dhe për të krijuar qeveri kanë nevojë për 121. Partitë e tjerra nuk janë gati të ofrojnë përkrahje prej 79 votave për kompensimin e kësaj mungese.
Në këtë situatë hapi tjetër i presidentit Plevneliev është dorëzimi i mandateve për krijimin e qeverisë. Pas bisedimeve suplementare në kuadrin e mbledhjes së ardhshme të Këshillit Konsultativ për Siguri Kombëtare, kreu i shtetit më parë do t’i dorëzojë një mandat partisë më të madhe – GERB. Nëse GERB-i refuzon, mandati do t’i dorëzohet Partisë Socialiste Bullgare. Në se ajo gjithashtu refuzon, Rosen Plevnelievi do të zgjedhë një parti tjetër për mandatin e tretë. Sipas Kushtetutës pas dështimit të mandatit të tretë Presidenti duhet të formojë një qeveri teknike. Zakonisht është puna e Presidentit që të shpërndajë Kuvendin dhe që të saktësojë datën e zgjedhjeve parlamentare, por ai nuk mund t’i bëjë këto gjëra në 3 muajt e fundit të mandatit të vet. Prandaj Gjykata Kushtetuese vendosi se me këto çështje do të merret presidenti i sapo zgjedhur Rumen Radev, i cili do të hyjë në detyrë më 22 janar 2017.
Në këto rrethana zgjedhjet për Kuvend do të zhvillohen pranverën e vitit të ardhshëm. Por deri atëherë deputetët duhet të punojnë me ritme të shpejtuara. Detyrat më urgjente të tyre janë pranimi i projektligjit për buxhetin e vitit 2017 dhe përcaktimi i sistemit zgjedhor për zgjedhjet e ardhshme. Mungesa e stabilitetit politik i bën këto angazhime shumë të vështira. Për zgjidhjen e problemit me sistemin zgjedhor po fillojnë konsultime politike me pjesëmarrjen e presidentit të ri Rumen Radev. Ekonomistët paralajmërojnë se është mirë që buxheti i vitit 2017 të jetë më konservator, për të mos vështirësuar zbatimin e tij. Në përkrahje të tezës se në kohën e krizës politike kontrolli mbi shpenzimet buxhetore është një detyrë e vështirë, nga Instituti i Ekonomisë Tregtare përmendin se “çmimi i krizës në Bullgari të viteve 2013-2014 është shumë herë më i madh sesa është çmimi i krizës “së madhe” pas vitit 2008”.
Përgatiti në shqip: Jordanka Ivanova
