“Duke pirë çaj në Marok në një kafene në mes të shkretëtirës, flisnim sa mirë do të ishte po të kishte ndonjë vend në Sofje ku të mblidhen aventuristët e ethur për udhëtime”, kujtojnë Margi dhe Sasho. Nisur nga ideja për një vend të veçantë ku udhëtarët rreth e rrotull botës të ndajnë informacione me njëri-tjetrin, Margi dhe Sasho së bashku me mikeshën e tyre Nadja kanë themeluar para një viti e gjysmë Klubin e Udhëtarit. Ky i fundit gjendet në rrugicën “Viktor Ygo” në qendër të Sofjes.
“Kemi për qëllim të nxisim njerëzit që të bëjnë udhëtime dhe t’i bindim ata se nuk është aspak vështirë – sqaron Margi. – Duam të lindim respektin për malin te njerëzit, po ashtu të japim informacione të plota. Klubi i Udhëtarit disponon një bibliotekë shumë të pasur falë librave nga mbarë bota të cilët na sjellin miqtë tanë. Kur ndonjë kureshtar na bën pyetje për vend ku nuk kemi qenë, ne i caktojmë atij takim me njeri i cili ka udhëtuar për në këtë vend. Kështu shkëmbehen informacionet.”
Logoja e Klubit të Udhëtarit është një gomar. Interieri i hapësirës së brendshme është shumë interesant. Në vend të karrigeve të zakonshme ka thes të mbushur me kashtë. Tavolinat janë të vogla prej druri. Në Klubin e Udhëtarit organizohen aktivitete të ndryshme.
“Prezantojmë kryesisht udhëtimet që kanë bërë miqtë tanë. Ndonjëherë i ftojmë vetë udhëtarët për të rrëfyer për aventurat që kanë përjetuar – thotë Margi. – Bisedat janë tepër interesante. Në klubin mund të mblidhen 34 veta. Pra, hapësira nuk është shumë e madhe dhe atmosfera bëhet intime, pimë nga një gotë çaj ose verë. Ne organizojmë dhe kurse të ndihmës së parë gjatë udhëtimeve. Pothuajse çdo muaj zhvillojmë kurse të tilla. Interesi është i madh. Është me rëndësi të dimë se si reagohet në situata ekstreme, p.sh. çfarë duhet të bëhet kur ka ortek, se si duhet të veprohet në kushte të këqija meteorologjike si gjatë dimrit, ashtu dhe gjatë verës.”
Fansat e Klubit të Udhëtarit janë shumë, të moshës së ndryshme dhe me profesione të ndryshme. Ivan dhe Tatjana rrëfejnë për muajin e tyre të mjaltit. Në vazhdim të katër muajve ata kanë bërë udhëtim autostop në Amerikën Latine. Për sa i takon Margit, ajo e ka lënë profesionin e llogaritares për t’u bërë udhërrëfyese në mal dhe trajnuese në ski. Çdo dimër së bashku me Sashon punojnë si instruktorë të skive në Alpet Austriake.
Margi dhe Sasho kanë udhëtuar kryesisht autostop, duke u strehuar në vende të parezervuara paraprakisht. Kanë qenë në Turqi, Gjibraltar, Portugali dhe në Spanjë. Në këto vende të dy të rinj kanë qëndruar edhe me qëllim pune. Po ashtu kanë bërë udhëtim në vendet e Ballkanit, sepse siç pohojnë vetë ata Ballkani ende është një vend i egër që tërheq vëmendje.
Cilat janë vendet në Bullgari që Margi i parapëlqen për turizëm?
“Liqeni Beglika në malet Rodope është një vend të cilin e preferoj. Çdo vit shkoj aty, duke marrë pjesë në kampet verore për fëmijët, të organizuara nga organizata joqeveritare “Bajkaria”. Një vend tjetër i preferuar për mua është maja Maljovica në malin Rila. Aty shkoj për të ushtruar sportin e skive, t’i ngjitem malit ose thjesht për t’u çlodhur, duke më shoqëruar miqtë e mi.”
Përgatiti në shqip: Anna Kapitanova
Bashkia Llëki e Rodopeve po punon për ndërtimin e një eko-shtegu të ri që do të çojë drejt majës emblematike Stançov Kamëk, mësojmë nga faqja e internetit bgtourism.bg. Maja është 1299 m e lartë dhe fjalë për fjalë qëndron mbi qytetin Llëki. Tani pjesa..
Monumenti i braktisur në majën Buzlluxha është bërë i famshëm në Instagram, duke zënë vendin e 10-të në renditjen e ndërtesave të braktisura më të vizituara në botë. Të dhënat e kompanisë së sigurimeve Alan Boswell Group, e specializuar në..
Një tren special me vagonë retro do të udhëtojë çdo të shtunë dhe të diele gjatë korrikut në një itinerar nga stacioni Septemvri deri në stacionet Velingrad dhe Cvetino dhe në drejtim të kundërt me rastin e Festave të 51-ta Kulturore të Velingradit...