Valle, kostume kombëtare dhe lojëra janë gërshetuar në interpretimet e grupeve folklorike, që marrin pjesë në Festivalin Ndërkombëtar të Fëmijëve. Ata janë të moshës nga 8 deri më 14 vjeç dhe dalin në skenë me dëshirë të madhe, që të tregojnë bukurinë e rinisë dhe të talentit të tyre.

Një iniciativë grumbulloi për herë të tretë me radhë fëmijët e vendeve të ndryshme në kryeqytetin tonë. Edicioni i sivjetshëm i Festivalit Folklorik Ndërkombëtar të Fëmijëve fillon më 24 prill dhe do të vazhdojë katër ditë në katër skena të Sofjes. Për organizimin e tij ndihmojnë krijuesit dhe koreografët e ansamblit koreografik për fëmijë dhe adoleshentë “Pllamëçe”, ndër të cilët është edhe Ivajllo Përvanov. Ai na tregoi më shumë hollësi për ngjarjen në fjalë: “Mirëpritëm kolektive të huaja nga gjashtë shtete: Sllovakia, Polonia, Bosnja e Hercegovina, Estonia, Franca dhe Rusia. Na presin koncerte shumë të bukura, sepse grupet janë shumë të mira. Sivjet më shumë se 90 formacione shprehën dëshirë për të marrë pjesë në festival. Pas një seleksionimi serioz ftuam gjashtë grupe. Në programin e çdo një pjesëmarrësi duhet të jetë i pranishëm folklori i tij. Polakët nga “Mali Xjanishanie” do të paraqesin këngët e tyre autentike popullore. Ansambli i Sllovakisë mbërrin me një orkestër prej dhjetë anëtarësh dhe valltarësh të mirë,  të cilët paraqitin folklorin e tyre karakteristik nga syri i fëmijës. Do të shohim edhe valle popullore nga rajoni i Sarajevës në programin e pjesëmarrësve nga Bosnja e Hercegovina. Formacioni i tyre “Gajret” është krijuar në vitin e largët 1903.”

Për herë të parë në Bullgari do të mbërrijë ansambli “Vezelinka” nga Belgorodi i Rusisë. Në programin e festivalit ai do të interpretojë këngë popullore ruse. Në repertorin e vet fëmijët nga “Kaina” shpresojnë tek folklori i pasur i Estonisë. Grupi francez nga qyteti Hagenau i krahinës Elzas mban emrin “Les Sarabandes du Folk” dhe për herë të parë del nga atdheu. Është interesant emri i grupit folklorik për fëmijë dhe adoleshentë nga qyteti Trençin i Sllovakisë – “Korniçka”. Milena Cankova, koreografe dhe organizatore e festivalit sqaroi se kështu quhet një mënyrë e posaçme e gërshetimit të flokëve të vajzave.

“E ndryshmja nga edicionet e kaluara është iniciativa jonë e përbashkët me CIOFF (Këshilli Ndërkombëtar i Organizatorëve të Festivaleve për folklor dhe arte tradicionale, partner oficial i UNESKO-s). Më 26 prill do të ketë një koncert në Kopshtin e Borisit. Në programin e pasur janë përfshirë edhe pjesëmarrës nga Gabrovo, Pazarxhik, Sopot dhe Sofja. Në skenë do të shfaqen fëmijë nga jetimoret, si dhe interpretues të talentuar nga shkolla për fëmije me çrregullime të të parit “Lui Brajl” në Sofje dhe grupi vokal “Feniks” pranë Bashkimit të të Verbërve.”

Koncerti zhvillohet me moton: “Bashkë mundemi më shumë”. Organizatorët premtojnë befasime për publikun. Afati i konkursit “Zbulo dhe bëni një fotografi me një plakat të festivalit” është deri më 26 prill. Fotografitë mund të publikohen në faqen e Facebook-ut të aktivitetit. Për fituesit do të ketë çmime të posaçme.

Gjatë ditës së fundit të festivalit do të nisë një paradë e interpretuesve nga Pallati Kombëtar i Kulturës në Sofje, i cili do të kalojë afër Presidencës dhe Kuvendit Popullor dhe do të ndalojë në Kopshtin e Borisit. Atje është koncerti i fundit. Pas tij çdonjëri, i cili ka dëshirë, mund të mësojë vallen e preferuar nga ai. Këmbimi kulturor mes fëmijëve nëpërmjet gjuhës universale të artit, është ndër qëllimet e organizatorëve. Ata i falënderojnë bamirësit e tyre që ndihmuan për organizimin e aktivitetit për herë të tretë me radhë.

Përgatiti në shqip: Vesella Mançeva