Bullgaria aplikon dezinfektimin e detyrueshëm të makinave në të gjitha pikat kufitare, për shkak të shpërthimeve të murtajës së ripërtypësve të vegjël të zbuluar në Greqinë Veriore. Autoritetet bullgare kanë dërguar letra njoftimi për të gjitha vendet fqinje për vendosjen e masës që nga sot, 5 gusht. Te kafshët do të bëhen edhe teste PCR dhe kalimi i kufirit do të lejohet vetëm pas rezultatit negativ. Pronarët duhet të jenë të kujdesshëm që të mos përziejnë tufat dhe të monitorojnë kafshët për simptoma. Deri më tani në territorin tonë nuk është konstatuar sëmundja ngjitëse e cila shkakton dëme të rënda ekonomike. Sëmundshmëria mund të arrijë 100 për qind, dhe tufat shkatërrohen. Autoritetet theksojnë se nëse kopetë shkatërrohen, fermerët do të dëmshpërblehen.