Para evropiane në Bashkinë e Ardinos

botuar më 11-08-09 10.35.PD

Me kuadrin e programit “Zhvillimi regjional” financohet riparimi i rrugës deri në Urën e Djallit, si edhe restaurimi dhe konservimi i këtij objekti turistik.

Foto: bg.wikipedia.org

Një nga qytetet më jugore bullgare është Ardino. Ai shtrihet ndër valëzimet piktoreske të malit Rodope. Popullsia e qytezës është e përzier – të krishterë dhe myslimanë. Ajo është dhe qendra e një bashkie, në të cilën përfshihen 52 fshatra. Siç thotë Resmi Muradi, kryetari i ri i bashkisë, deri tani njerëzit merreshin më tepër me rritjen e duhanit. Por tani kjo degë nuk subvencionohet dhe ata kërkojnë prodhime alternative. Dhe këtu ndihmojnë programet evropiane.

“Anëtarësia e Bullgarisë në BE tashmë ndihet në një qytet të vogël si Ardinoja – shënon kryebashkiaku. – Ne arritëm të realizonim disa projekte në kuadër të programeve të ndryshme operative. Një nga projektet ishte për shndërrimin e trotuareve, për formimin e hapësirave të gjelbra dhe shesheve të fëmijëve. Kjo u vlerësua shumë mirë nga bashkëqytetarët tanë.”

Në kuadër të programit “Zhvillimi regjional” në Ardino u realizuan disa projekte për përmirësimin e efektivitetit energjetik të ndërtesave të shkollave. Pas riparimit dhe sanimit të ndërtesave, shpenzimet për ngrohje gjatë dimrit u ulën konsiderueshëm. Përveç kësaj në bashki planifikohet një program i lidhur me monumentet kulturore dhe natyrore të krahinës.

“Turizmi është një nga prioritetet tona – thekson Resmi Muradi. – Ardinoja ndodhet në një vend shumë të bukur në mal dhe zhvillimi i turizmit mund të kontribuojë për gjallërimin e bashkisë.” Një nga projektet më ambicioze mban emrin “Nga Ura e Djallit drejt shtigjeve të parajsës në Ardino”. “Punojmë për përmirësimin e infrastrukturës turistike në kuadër të programit “Zhvillimi regjional” – shpjegon Resmi Muradi. – Projekti përfshin riparimin e rrugës deri në Urën e Djallit, e cila ndodhet 10 km larg Ardinos, restaurimin dhe konservimin e urës dhe zhvillimin e shtigjeve ekologjike deri në Shkëmbinjtë e Shqiponjave. Vlera e projektit është mbi tre milionë leva (një e gjysmë milion euro). Mjetet do të përdoren dhe për reklamën e produkteve turistike që ofrohen nga bashkia.”

Sipas të dhënave të Qendrës turistike të informacionit në qytet, kriza ekonomike ka ndikuar dhe në turizmin në këtë krahinë. U pakësuan si grupet e organizuara, ashtu edhe turistët individualë, thotë Velislava Kosova, kryetare e qendrës. Mysafirët interesohen më tepër për Urën e Djallit nga shekulli XV me një arkitekturë jashtëzakonisht të bukur dhe interesante. Një objekt tjetër që i tërheq vizituesit janë Shkëmbinjtë e Shqiponjave, në të cilët trakët e lashtë kanë bërë një shenjtërore, duke gdhendur afro 100 kamare kulti në gur. Meritojnë të shihen dhe kështjella mesjetare Krivus afër fshatit Bashevo dhe rezervati “Mështeknat e bardha”.

Ardinoja është ndër pak bashkitë që arritën në kohën e krizës të ndërtojnë dy qendra të rëndësishme sociale në kuadër të një projekti me vlerë 370 mijë leva (185 mijë euro). Njëri prej tyre është e ashtuquajtura “Banesë e mbrojtur” për fëmijë dhe gra, viktima të dhunës. Kjo është qendra e parë e këtij lloji në Rodopet Lindore. Projekti tjetër është Qendra ditore për 600 njerëz të moshuar me çrregullime.

Bashkia paraqiti në Agjencinë për Ndihmë Sociale pranë Ministrisë së Punës dhe Politikës Sociale një projekt, me të cilin do t’u sigurohen ndihmës njerëzve me çrregullime. Punohet aktivisht dhe për prevencën e kriminalitetit në moshë fëmijërore. Është duke u realizuar një projekt, i cili ta rinovojë mjedisin e qytetit dhe ta bëjë një vend tërheqës për investime. Për të sigurohen rreth 600 mijë leva (300 mijë euro) nga Programi evropian për zhvillim të rajoneve fshatare. Prapë nga ky program priten mjete për riparim të rrjeteve dhe pajisjeve për furnizim me ujë në fshatrat Bjal izvor dhe Mleçino. Një nga problemet e këtij rajoni malor është pikërisht furnizimi me ujë, mungesa e ujit ndihet më ashpër gjatë muajve të verës, pohon kryetari i bashkisë. Programi për zhvillim të rajoneve fshatare tashmë ka ndihmuar shumë fshatra të bashkisë për ta zgjidhur këtë problem dhe njerëzit nuk ankohen më nga mungesa e ujit.

Territori i bashkisë ndodhet në kufirin me Greqinë. Sipas Programit për bashkëpunim transkufitar punohet mbi një projekt për drejtimin e qëndrueshëm të ujërave dhe për ruajtjen e shumëllojshmërisë biologjike në rajonet kufitare. A është e lehtë rruga nga përgatitja e një projekti deri në miratimin e tij nga institucioni përkatës?

“Varet nga kompetenca e kuadrove – përgjigjet Resmi Muradi. – Në qoftë se e njohin mirë karakterin e punës është e lehtë, nëse jo – është e vështirë. Ne tashmë kemi përvojën e duhur dhe kapacitetin administrativ për përgatitjen e projekteve të ndryshme sipas programeve operative. Ardinoja është e përgatitur për kandidaturë sipas të gjitha programeve.”

Përgatiti në shqip: Ekaterina Tarpomanova

По публикацията работи: Sevda Djukjanxhi

Последвайте ни и в Google News Showcase, за да научите най-важното от деня!

Ndaje

Para evropiane në Bashkinë e Ardinos

Më shumë nga rubrika

PBB-ja është rritur me 2.2% sipas bazës vjetore në tremujorin e tretë

Konfederata e Punës “PODKREPA” kritikoi ashpër projektin për ndryshime në Kodin e Punës

Biznesi është i shqetësuar se kriza politike po pengon zhvillimin e vendit

PBB-ja është rritur me 2.2% sipas bazës vjetore në tremujorin e tretë