Në Kinë rriten mollë dhe qershi bullgare

botuar më 13-01-17 12.27.MD

Foto: arkiv

Doc. Atanas Bllagoev nga Instituti i Bujqësisë në qytetin Kjustendill është bullgari, i cili para pak kohe mori titullin kinez “këshilltar kombëtar mbi pemëtarinë”. Specialisti në fushën e prodhimit të mollëve dhe të seleksionimit të llojeve të ndryshme të pemëve tregon se për shkak të kushteve pothuaj të njëjta klimatike të shumë provincave kineze me ato bullgare, atje mund të rriten dhe tashmë po rriten lloje bullgare qershish, mollësh dhe dardhash. Atanas Bllagoev është njeriu, i cili i njeh me përvojën e vet specialistët kinezë në fushën e seleksionimit dhe krijimit të llojeve të reja të mollëve, të cilat rriten në kushtet e njëjta klimatike të këtij vendi.

Bashkëpunimi filloi në vitin 2001, kur shkencëtari paraqiti në tri kumtesa shkencore në një konferencë në qytetin kinez Jantaj përvojën e vet në krijimin e 6 llojeve të mollëve. Vitin tjetër ai u ftua përsëri nga Instituti i Pemëtarisë në Jantaj dhe kështu është edhe sot e kësaj dite. “Në fund të vitit 2010 përpiluam një projekt shkencor, që përkrahet nga qeveria e Kinës dhe është lidhur me përmirësimin e strukturës së llojeve të pemëve në vend – tregon z. Bllagoev. – Që nga atëherë çdo vit jam në Kinë për nëntë muaj. Me kolegët e mi kinezë gjatë seleksionimit krijojmë lloje të reja mollësh me cilësi më të larta. Llojet e mollëve të krijuara në Bullgari, pavarësisht se janë në kuadrin e programit për bashkëpunim midis dy vendeve tona, si dhe llojet kineze, të krijuara në Kinë në kuadrin e këtij programi, mbeten pronë intelektuale e vendit përkatës. Ne disponojmë të drejtën e patentës për t’i ruajtur dhe në qoftë se ka njerëz, të cilët dëshirojnë t’i rritin këto lloje, e drejta e patentës mund të merret kundrejt pagimit të taksave përkatëse. Duke pasur parasysh këto kushte, sa u përket llojeve të krijuara nga unë dhe të cilat janë bullgare, nuk ka problem, në rast se Kina vendos për t’i rritur. Kam parasysh provincën Shandun, në të cilën ka kushte të njëjta klimatike, si në vendin tonë, pse jo dhe në disa provinca të tjera me kushte të njëjta klimatike.”

Në fakt qershitë bullgare rriten që prej shumë kohe në Kinë dhe janë përhapur në tregun vendas. Gjatë një vizite në vitin 1999, specialistët nga Instituti i Bujqësisë në Kjustendill sollën kalem prej 7 llojeve të qershive bullgare, të krijuara në institut, të cilat i ka në koleksionin e vet Instituti i Kjustendilit. Një pjesë e madhe e këtyre llojeve të qershive tashmë rriten në masë në Kinë, si dhe llojet bullgare të dardhave, të cilat dallohen nga ato që njihen në Kinë.

“Ata shfaqin interes ndaj dardhave tona të llojit “Viljamova Maslovka”, “Abat Fetel”, “Konferencia”, Popska” – thotë Atanas Bllagoev. – Aktualisht bëjnë prova për adaptimin dhe rritjen e tyre në rajone ekologjikisht të pastra në Kinë, jo vetëm në provincën Shandun, në të cilën unë punoj, por edhe në provincat Shansi, Hëbej, Ljaoning etj., ku tashmë janë mbjellë pemë dardhash të llojeve të dardhave të lartpërmendura.”

Bashkëpunimi midis shkencëtarëve bullgarë nga Instituti i Bujqësisë në Kjustendill dhe specialistëve kinezë po vazhdon. Gjatë muajit shtator të vitit 2012 dy veta nga Instituti kanë paraqitur përvojën e tyre në fushën e seleksionimit të llojeve të ndryshme të pemëve në një konferencë ndërkombëtare, kushtuar llojeve të mollëve në Jantaj. Sivjet në Kjustendill do të mbërrijnë disa shkencëtarë kinezë, kurse për meritat e tij në fushën e seleksionimit të llojeve të mollëve dhe për bashkëpunimin e tij me Kinën, para tre vitesh doc. Atanas Bllagoev mori një medalje të artë personalisht nga kryeministri i këtij vendi.

Përgatiti në shqip: Vesella Mançeva

По публикацията работи: Millka Dimitrova

Последвайте ни и в Google News Showcase, за да научите най-важното от деня!

Ndaje

Në Kinë rriten mollë dhe qershi bullgare

Më shumë nga rubrika

Hungaria merr presidencën e BE-së: çfarë axhendesh do të formojë në gjashtë muajt e ardhshëm dhe a priten kompromise në disa nga linjat kryesore politike të Bashkimit

Filloi Shkolla Verore e Gjuhës Bullgare në Tiranë

Specialistët e filologjisë franceze në vendin tonë kanë mundësi të mira për realizim profesional

Universiteti i Ri Bullgar prezanton specialitetet e tij me mundësinë e studimit në frëngjisht

Parlamenti Evropian konfirmoi kursin e BE-së të 5 viteve të mëparshme

Një zonë e re e Terminalit 2 ofron një vend për të punuar dhe relaksuar në Aeroportin e Sofjes