Banka Korporative Tregtare, banka e katërt për nga madhësia në Bullgari, falimentoi në vitin 2014 si rezultat i administrimit të keq nga ana e pronarit të saj mazhoritar Cvetan Vasilev. Banka u kishte dhënë kredi të pasigurta kryesisht firmave, të kontrolluara nga ky njeri, i cili fitoi dy herë çmimin “Bankier i Vitit”. Si rrjedhim i falimentimit të bankës shteti u detyrua të marrë një hua prej mbi 2 mlrd eurosh në tregjet financiare ndërkombëtare, që të paguajë depozitat e garantuara nga ligji të njerëzve dhe firmave. Kjo pothuaj shkaktoi krizë financiare në vend dhe huaja e marrë tani duhet të paguhet nga të gjithë bullgarët. Ndërkaq, bankieri i pasur u largua nga vendi, duke u vendosur në Serbi, dhe nuk guxon të kthehet në Bullgari, megjithëse thotë vazhdimisht se nuk ka faj për këto ngjarje.
Administratorët e caktuar nga gjykata të bankës vazhdojnë të përpiqen për të grumbulluar diçka nga kreditë e dhëna, që t’i kthejnë shtetit ndonjë shumë. Mirëpo, tani për tani, ata nuk shënojnë suksese të konsiderueshme. Në këtë sfond Komisioni, i cili merret me konfiskimin e pronësisë së paligjshme, komision ky për të cilin ka shumë debate sa i përket efikasitetit të tij, vendosi për t’i marrë gjërat në duart e veta. Komisioni në fjalë parashtroi një kërkesë në gjykatë për konfiskimin e pronësisë së Cvetan Vasilevit me vlerë më shumë se 1 mlrd euro. Këto aktive pa dyshim e bëjnë njeriun më të pasur në Bullgari dhe ndoshta janë rekord edhe në tërë Evropën. Një kërkesë e tillë për konfiskimin e një pronësie për mbi një mlrd euro ndoshta do të shkaktonte interes të madh kudo që të jetë dhe mediat pa dyshim do ta pasqyronin zhurmshëm ngjarjen. Ndër pronësinë e deklaruar për konfiskim ka pasuri të patundshme në Bullgari për afro 50 mln euro. Në Sofje ndodhet godina administrative e Bankës Korporative Tregtare, një pallat, apartamente, atelie, garazhe, parcela, depo etj. Pasuri të patundshme ka gjithashtu në Sozopoll, Varna dhe Carevo. Sipas Komisionit, Vasilev është lidhur edhe me pronësinë e një shtëpie luksoze në Zvicër, e cila kushton mbi 24 mln euro. Komisioni ngul këmbë edhe për 6 mln euro në llogari të tij bankare, si edhe për tri automobila Mercedes me vlerë të përgjithshme mbi 500 mijë euro. Në kërkesë janë shënuar gjithashtu aksione në shoqëri për mbi 70 mln euro, aksione të tjera për mbi 300 mln euro, piktura, monedha të vlershme. Përveç kësaj Komisioni ka arritur të sekuestrojë disa llogari të Vasilevit në Zvicër.
Mirëpo, ekspertët nuk janë optimistë të mëdhenj sa i përket kërkesës në gjykatë. Së pari kundër Cvetan Vasilevit nuk ka akuzua zyrtare. Së dyti, do të jetë vështirë të provohet se pronësia në fjalë është marrë në mënyrë të paligjshme. Ndoshta Cvetan Vasilev do të mund të paraqesë të gjitha dokumentet e domosdoshme për origjinën e parave, pasi ai vetë ia ka dhënë vetes dhe firmave të tij këto para. Së treti, Komisioni për marrjen e pronësisë së paligjshme deri tani nuk mund të lavdërohet me rezultate të konsiderueshme, megjithëse ka shumë kohë që punon. Sipas të dhënave, Komisioni ka arritur të marrë miratimin e gjykatës për kërkesa të tij vetëm për rreth 8 mln euro, që është mjaftë nën shpenzimet për ekzistencën dhe funksionimin e tij. Domethënë deri tani Komisioni nuk ka arritur të grumbullojë nga paratë e konfiskuara madje mjete për buxhetin e vet. Dhe së fundi, është tepër e dyshimtë se në buxhetin e shtetit mund të derdhen 1 mlrd euro nga shitja e pronësisë së një bankieri, i cili e ka falimentuar bankën e udhëhequr nga ai. Vetë shefi i Komisionit për Konfiskimin e Pronësisë Pllamen Georgiev thotë se mund të priten rreth 700 mln euro, që nuk është një shumë e vogël, por duket tepër optimiste, duke pasur parasysh ndikimin e madh të bankierit kudo në botë, dhe duke mos harruar të metat e mëdha dhe varësitë e drejtësisë bullgare nga të fortët e ditës. Do ta ndjekim zhvillimin e kësaj sage interesante për apetitet e pasanikëve bullgarë dhe mjetet e përdorura nga ata për të përfituar gjithnjë e më shumë, pa rëndësi se çfarë është çmimi dhe pa pasur ndëshkim.
Përgatiti në shqip: Vesella Mançeva
Bullgaria do të marrë 65.2 milionë euro nga BE për një projekt për forcimin e rrjetit të transmetimit të energjisë elektrike në mbështetje të integrimit të energjisë së rinovueshme, sipas një deklarate nga Komisioni Evropian. Paratë janë pjesë e një..
Bullgaria mund të hyjë në eurozonë në fillim të vitit 2026. Sipas një studimi të Shoqatës së Tregtarëve të Mallrave Jo-Ushqimore, kjo është periudha reale në të cilën vendi ynë do të mund të përmbushë kriteret për Eurozonën. Sipas sondazhit, 25% e të..
Tregtia e produkteve bujqësore dhe ushqimore mes Bullgarisë dhe Kinës u rrit me mbi 37% në vitin 2023. Këtë e deklaroi ministri i bujqësisë dhe ushqimeve Georgi Tahov në hapjen e Forumit Bullgaro-Kinez të Biznesit në Sofje. Sipas tij, eksporti i..