Manastiri i Shenjtorëve Pjetri dhe Pavli ndodhet në Rrafshnaltën e Arbanasit, kurse kambaneria e tij tërheq vëmendjen që nga larg. Tingulli i kambanerisë dëgjohet që në qytetin e afërt Ljaskovec, i cili është i njohur për kantinën e tij të verës dhe traditat në kopshtari. Vetëm 6 km larg ndodhet Veliko Tërnovo. Pikërisht me historinë e kryeqytetit të vjetër është lidhur fati dramatik i vendit të shenjtë.
Manastiri është themeluar nga disa bujarë të Tërnovos. Sot ai është i njohur si Manastiri i Shenjtorëve Pjetri dhe Pavli, ose si Manastiri i Ljaskovecit. Ai ka pësuar disa sulme armiqësore, zjarre, tërmete dhe është përdorur për qëllime jofetare gjatë kohës së totalitarizmit, por megjithatë manastiri ekziston edhe sot e kësaj dite dhe vazhdon të tërheqë besimtarë nga mbarë vendi.
“Sipas shumicës së burimeve ai është themeluar gjatë shekullit të XII-të në vendin e një kështjelle romake nga shekulli i dytë – na tregon Sofia Bozhkova nga qendra bashkiake turistike “Carevgrad Tërnov” – Në këtë kështjellë mblidheshin ithtarët e bujarëve të Tërnovos – Asen dhe Pjetri, të cilët e organizuan kryengritjen kundër robërisë bizantine. Pas fundit të saj ata vendosën ta themelojnë këtë manastir.”
Pas rënies së Bullgarisë nën zgjedhën osmane, afro dy shekuj më vonë, manastiri u grabit disa herë. Por pas çdo një sulmi ai rimëkëmbej në saje të përpjekjeve të vendasve. Shumë kohë manastiri ndodhej nën udhëheqjen e peshkopit grek, sepse Peshkopata e Tërnovos ishte nën udhëheqjen e Patrikanës Greke të Kostandinopojës. Grekët i dëbuan murgjit tanë dhe në vend të tyre emëruan njerëz të vet. Që në vitin 1870, pas shpalljes së pavarësisë së Kishës bullgare, murgjit tanë përsëri u vendosën në manastir.
“Në këtë vend mblidheshin njerëzit që kishin lidhje me luftërat për çlirimin tonë kombëtar nga zgjedha osmane në regjionin e Veliko Tërnovos gjatë shekujve XVII – XVIII – na tregon Sofia Bozhkova. – Në atë kohë manastiret ishin fshehur nga syri i sunduesit. Atje zhvillohej veprimtari iluministe dhe ruhej shpirti bullgar. Gjatë Rilindjes edhe Manastiri i Shenjtorëve Pjetri dhe Pavli ishte qendër e luftërave çlirimtare kombëtare, këtu diskutohej veprimtaria e komiteteve revolucionare.”
Gjatë viteve 70 të shekullit të XIX në manastir u hap Seminari i parë bullgar, por pak pas Çlirimit ai u mbyll, që të shndërrohet në... çmendinë. Në vitin 1913 një tërmet i fuqishëm shkatërroi pothuaj gjithçka, me përjashtim të disa godinave. Më vonë manastiri u rimëkëmb dhe funksiononte si manastir grash. Ai ka qenë shtëpi e vajzave memece, këtu ka pasur gjithashtu shkollë për këndim ortodoks, kurse gjatë regjimit totalitar në godinat e tij vendoseshin gra nga Sofja, që merreshin me prostitucion. Pamja e tanishme e manastirit është nga vitet 60 të shekullit të XX-të, kur ai u rimëkëmb krejtësisht. Aktualisht këtu banojnë tri murgesha dhe një rishtare e re. Kisha është e restauruar, kambaneria, e lartë mbi 30 metra, e cila u rrëzua nga tërmeti, u rimëkëmb në vitin 1980, kurse sahati nën të është dhuratë nga një grua nga Ljaskoveci, e cila aktualisht banon jashtë shtetit.
Po të vizitosh kishën e vogël “Triada e Shenjtë” do të ndihesh në një botë tjetër. Supozohet se kisha është ndërtuar në vendin e një altari pagan, i cili më vonë është shndërruar në tempull të vogël. Pikërisht në këtë vend vëllezërit Asen dhe Petër janë bekuar se do ta çlirojnë popullin e vet nga sunduesi osman, kurse pas kësaj do ta ndërtojnë një manastir si shenjë e lirisë. Prandaj, sipas besimeve popullore, po të shkruash një dëshirë në një copë letër dhe pas kësaj e vë pusullën me dëshirën midis gurëve, dëshira jote do të plotësohet. Manastiri i dërgon vizituesit me mbishkrimin “Mua nuk më preku as shpata dhe robëria, as zjarri, as tërmeti. Kam qenë dhe do të vazhdoj të jem shpirti dhe mbështetja e të krishterëve.”
Përgatiti në shqip: Vesella Mançeva
Në Ditën e të Gjithë Shenjtorëve, kur Kisha jonë Ortodokse përkujton Koncilin e 12 Apostujve dhe kujtimin e të gjithë martirëve dhe rrëfimtarëve të njohur dhe të panjohur të Krishtit, besimtarët në Bullgari u shpërblyen për besimin e tyre. Mezi ka më..
Thirrja e kishës është të mbledhë ata që janë ndarë, deklaroi patriarku i ri bullgar Daniil para liturgjisë së tij të parë të shenjtë. “Ka shumë detyra. Sot është një ditë e veçantë, në të cilën festohet kthimi i relikteve të Shën Ivan Rillskit..
Për herë të parë, dy nga vendet më misterioze arkeologjike në Rodopet Lindore janë studiuar në detaje nga ajri. Arkeologët bullgarë fotografuan kompleksin shkëmbor Harman Kaja pranë fshatit Bivoljane dhe kështjellën e lashtë Asara pranë Tatul me të..
Një tempulli trak nga shekulli III para Krishtit pa analog në vendin tonë mund të shndërrojë 10 hektarë të zonës "Jug" ("Juzhen") të Plovdivit në..