Më 20 dhjetor mbushen 40 vjet nga përfundimi i suksesshëm i lundrimit rreth botës me jahtin “Kor Karoli” të kapitenit Georgi Georgiev – bullgari i parë, i cili ka kryer solo-lundrim e parë rreth botës. Sot fondacioni “Kor Karoli” në Varna, që e mban emrin e jahtit të njohur u dorëzon çmimet e veta vjetore “Globi i Artë” lundruesve më të mirë gjatë vitit. Dekorata e sivjetshme është për dr. Vasil Kurtev nga Kavarna për lundrimin e tij rreth botës. Ai është dentist për nga profesioni, por emri i tij u bë emblemë në lundrimin me vela në Bullgari, në saje të punës së tij ndërtimore të jahteve dhe lundrimeve të tij. Më 5 gusht 2015 dr. Kurtev u largua nga Kavarna si kapiten i jahtit “Odesos” për të realizuar solo-lundrimin e tij rreth botës. Pothuaj dy vjet më vonë – më 19 maj 2017 ai akustoi përsëri në Kavarna.

Për 645 ditë jahti “Odesos” lundroi rreth 26 mijë milje detare dhe mbylli rrethin rreth Tokës. Ka një hollësi interesante: më 22 janar 2017 dr. Vasill Kurtev festoi vetë në ujërat e Gjirit të Bengalit jubileun e tij të 80-të. Ai është një ithtar i flaktë i Georgi Georgievit – lundruesi i vetmuar, për të cilin na tregoi dr. Mariana Krësteva, drejtoresha e Muzeut Ushtarako-Detar në Varna:

“Kapiteni Georgi Georgiev është një legjendë e vërtetë në lundrimin me vela në Bullgari dhe është një personalitet me rëndësi të madhe në lundrimin bullgar në përgjithësi. Emri i tij duhet të dihet nga njerëzit e rinj, të cilët duan të ecin në rrugën e tij, e duan lirinë dhe dëshirojnë të bëhen lundrues. Kapiteni Georgiev i përballoi vetë të gjitha stuhitë dhe vështirësitë në lundrimin detar. Pse është i njohur? Ai është bullgari i parë i cili realizoi solo-lundrimin e parë rreth botës me një jaht me vela. Në dhjetor të vitit 1976 ai u nis nga Havana dhe e mbaroi lundrimin e vet më 20 dhjetor të 1977-ës përsëri në portin Havana. Ditët e lundruara nga ai në det janë gjithsej 202. Për këtë lundrim rreth botës ai ka përgatitur tërë jetën. Që si i ri ai filloi të studionte lundrimin me vela. Kapiteni Georgi Georgiev ka lindur në qytetin Kërxhali, por tërë jetën e ka kaluar rreth detit. Georgi Georgiev ishte zgjedhur për ta paraqitur Bullgarinë në garën ndërkombëtare për lundrim me vela OSTAR – një regatë shumë prestigjioze transatlantike gjithashtu për lundrues të vetmuar, e cila nisej nga Britania e Madhe dhe vazhdonte deri në Plimut të SHBA-së. Kjo ishte paraqitja e parë e madhe ndërkombëtare e lundruesve bullgarë dhe u kurorëzua me sukses të madh. Kështu Georgi Georgiev e filloi udhëtimin e tij të parë rreth botës. Lundrimi i tij ndiqej nga tërë shoqëria detare bullgare. Gjatë lundrimit të tij rreth botës ai kishte disa momente të vështira – kishte nevojë për meremetimin e anijes, ngeci në cekëtinë, por arriti t’i përballojë vështirësitë. Me emrin e jahtit të tij “Kor Korali” ka një çmim vjetor që dorëzohet për arritje më të mëdha në lundrimin me vela. Çmimi jepet që nga data e përfundimit të lundrimit të tij të parë.”

Dëshmia e gjallë e këtij lundrimi – jahti “Kor Karoli” është ekspozuar në Muzeun Ushtarako-Detar. Pronësi e muzeut është gjithashtu Libri i Rekordeve “Gines”, ku është shënuar lundrimi i aventurierit bullgar si arritja më e madhe e asaj kohe në lundrimin rreth botës me jaht me një korpus. Ky rekord na rikujton se kapiteni Georgi Georgiev zë vend edhe nga pikëpamja statistikore në shtegun e famës të lundruesve.

Përgatiti në shqip: Vesella Mançeva