Kompania qipriote e sigurimeve “Olympic” shpalli falimentim dhe mbeti pa licencë. Falimentoi edhe dega e saj në Bullgari. Në fakt nuk është e qartë se çfarë ka ndodhur më parë, sepse veprimtaria kryesore e kompanisë ka qenë përqendruar në Bullgari. Kështu mbi 200 000 automjete bullgare mbetën pa sigurimet e detyrueshme "Përgjegjësia civile" (të përgjegjësisë ndaj palëve të treta -TPL). Të prekura janë edhe shumë firma (në këtë numër edhe shtetërore), të cilat kanë pasur marrëveshje më kompaninë qipriote. Mes të tjerësh tani për tani nuk është e qartë në se bëhet fjalë pikërisht për qipriotë, apo për spanjollë – këtu informacionet nuk janë saktësuar.

Sipas legjislacionit bullgar të gjithë siguruesit tek ne kontrollohen drejtpërsëdrejti nga Komisioni i Mbikëqyrjes Financiare, anëtarët e të cilit janë zgjedhur nga Parlamenti. Por Komisioni nuk ka të drejta të kontrollojë veprimtarinë e filialeve të kompanive të huaja, të cilat janë regjistruara në shtetet e tjera të Bashkimit Evropian. Ato mbikëqyren nga autoritetet e kontrollimit në vendet përkatëse. Përveç se nuk ushtrohet kontroll mbi hapjen e degëve të tilla në Bullgari, ato nuk kanë nevojë edhe për licencë apo leje. Mjafton vetëm që kompania ëmë të lajmërojë Komisionin e Mbikëqyrjes Financiare. E gjithë kjo në fakt do të thotë se do të kalojë shumë kohë derisa njerëzit e siguruar në këtë shoqëri marrin kompensime nga fondi qipriot i kompensimeve, sepse më parë presim vendimin e gjykatës në Limasol për shpalljen e falimentimit dhe likuidimit dhe pastaj do të fillojë transferimi i parave në fondin bullgar të kompensimeve. Ndërkohë njerëzit e prekur do të duhet të lidhin në mënyrë urgjente marrëveshje të reja të sigurimit dhe të paguajnë për to.

Falimentimi i siguruesit qipriot në Bullgari shkaktoi reagime të ashpra dhe skandal të paparë në situata të ngjashme, të cilët mund të thuhet se i tejkalojnë  panikun rreth falimentimit të Bankës së katërt për nga madhësia Banka Korporative Tregtare gjatë vitit 2014. Tensioni i provokuar u bë shkak për ndërprerjen e pushimeve të deputetëve, të cilët të martën u mblodhën për seancë të jashtëzakonshme të parlamentit, të thirrur për shkak të kërkesës së partisë opozitare të socialistëve. Agjencia Shtetërore e Sigurimit Kombëtar dhe prokuroria filluan hetime në Komisionin e Mbikëqyrjes Financiare. Ato duhet të sqarojnë a ka pasur shkelje nga ana e Komisionit dhe cilat kanë qenë masat e ndërmarra nga organi përgjegjës për stabilizimin e gjendjes financiare të siguruesit. Në këtë kontekst Kryeministri Bojko Borisov tha se qeveria do të ndihmojë zgjidhjen e kazusit, por nuk do të angazhohet financiarisht. Ai kërkoi dorëheqjen e zëvendës-kryetares së Komisionit të Mbikëqyrjes Financiare Ralica Again, e cila përgjigjet për kompanitë e sigurimeve. Borisovi kërkoi nga Kuvendi krijimin e një grupi pune për kërkimin e mundësive për kompensimin e shoferëve të prekur nga falimentimi i shoqërisë “Olimpik”. Again vetë parashtroi dorëheqjen e saj, që pastaj u pranua në seancën plenare. Ministrja e punëve të jashtme Ekaterina Zaharieva bisedoi me ambasadorin e Qipros në Bullgari dhe insistoi për takim urgjent të ekspertëve bullgarë me kolegë të tyre qipriotë, të cilët do të kërkojnë zgjidhje nga kriza.

I kujt është faji për falimentimin e “Olympic” tani për tani nuk është e qartë. Dyshimet janë lidhur me pronarët e kompanisë, të cilët mund të kenë lidhje me një nga kompanitë e sigurimeve në tregun bullgar. Sipas pistës tjetër pronari zyrtar i “Olympic” është shtetas spanjoll, i cili pak para falimentimit është larguar nga Qiproja dhe po ndodhet në Britaninë e Madhe. Jo pak ekspertë pohojnë se faj për situatën e krijuar kanë vetë të siguruarit, të cilët kanë zgjedhur këtë kompani, të tërhequr nga çmimet e ulëta.

Sipas autoriteteve përgjegjëse bullgare puna e tyre është vështirësuar nga legjislacionet e papërsosura të Bullgarisë dhe të BE-së në fushën e sigurimeve. Për këtë arsye po flitet për domosdoshmërinë për amendamente në direktivat evropiane dhe në ligjet tona.

Përgatiti në shqip: Jordanka Ivanova