Para një forumi ndërkombëtar në Sofje, kushtuar kundërvënies së ekstremizmit, ministri bullgar i punëve të Brendshme Mlladen Marinov tha se nuk ka rrezik për vendin tonë nga terroristët, të cilët kalojnë përmes territorit të vendit tonë, duke u kthyer nga Lindja e Mesme. “Në Bullgari rreziku është i ulët, por kjo nuk do të thotë se ne nuk marrim të gjitha masat e parandalimit” – tha Marinovi dhe bëri thirrje për krijimin e një sistemi për identifikimin e shenjave të hershme të ekstremizmit, duke filluar me gjuhën e urrejtjes. Sipas tij ka nevojë për qasje gjithëpërfshirëse për kundërvënien e këtyre dukurive.

Thellimi i bashkëpunimit në regjion është një premisë e domosdoshme për sigurinë jo vetëm në nivel kombëtar dhe regjional, por edhe në tërë Evropën – me këtë ranë dakord Ministri i punëve të brendshme i Maqedonisë së Veriut Oliver Spasovski, homologu i tij nga Kosova Ekrem Mustafa dhe Zv.Ministrja e punëve të brendshme e Shqipërisë Romina Kuko. Shtetet e Ballkanit Perëndimor bashkëpunojnë me njëri-tjetrin në luftën kundër terrorizmit dhe ekstremizmit, u bë e qartë nga fjalët e tyre. Ata nënvizuan rolin e Bullgarisë, e cila gjatë Presidencës së saj të Këshillit të Bashkimit Evropian e imponuan në rendin e ditës të BE-së perspektivën evropiane të vendeve të Ballkanit Perëndimor dhe vazhdon të jetë e angazhuar me këtë çështje deri më sot.