Vendimi i Komisionit Evropian (KE) për të mbyllur parakohshëm blloqet 3 dhe 4 të centralit të vetëm bërthamor në Bullgari “Kozlloduj” ishte një “vlerësim shumë i gabuar”. Këtë e deklaroi në një intervistë për Radion Kombëtare Bullgare (BNR) një javë para tërheqjes zyrtare të Mbretërisë së Bashkuar nga BE-ja eurodeputeti britanik Geoffrey Van Orden nga grupi i konservatorëve dhe reformistëve evropianë. Ai ishte gjithashtu raportuesi për Bullgarinë para aderimit të saj në Bashkësi. “Unë zhvillova një betejë shumë të rëndë për “Kozlloduj”, që të ruaj blloqet 3 dhe 4. U harxhuan shumë mjete për përmirësimin e sigurimit të tyre dhe nuk kishte shkaqe që jeta e tyre të mos zgjatej me akoma 20-30 vjet. Bullgaria ishte eksportuese neto e energjisë elektrike, ndërsa pas kësaj pothuajse u shndërrua në importuese. Pikërisht në kohën kur bënim përpjekje për ta stimuluar ekonominë, nuk mendoj se mbyllja e dy furnizuesve kryesorë të vendit ishte në ndihmë të këtij qëllimi”, vuri në dukje Geoffrey Van Orden.