Nga 1 janari, vetëm Kroacia do të pranohet në zonën Shengen, Bullgaria dhe Rumania mbeten jashtë zonës pa kontroll kufitar. Në votimin e sotëm në Këshillin e BE-së, Austria votoi “kundër” pranimit të Bullgarisë dhe Rumanisë, kurse Holanda kundër Bullgarisë. 25 vende votuan në mbështetje të Bullgarisë. Më herët u bë e ditur se gjatë diskutimit Holanda kërkoi një raport të ri për Bullgarinë në kuadër të Mekanizmit të Bashkëpunimit dhe Verifikimit - një praktikë që Komisioni Evropian e ndaloi tre vjet më parë. Informacioni vjen nga korrespondentja e BNR në Bruksel, Angelina Piskova.

Bullgaria kurrë nuk ka pasur mbështetje më të madhe për Shengenin. Çështja do të ngrihet në takimet e ardhshme me Bashkimin Evropian, komentoi ministri i punëve të jashtme Nikollaj Milkov. Ai pret një vendim të ri pozitiv për pranimin e Bullgarisë në Shengen në mars.

Ministri i Punëve të Brendshme Ivan Demerxhiev i cilësoi si “politike” arsyet për votën negative për Bullgarinë nga Austria dhe Holanda. Sipas tij, vendimit të holandezëve i mungon konstruktivizmi. Ai shtoi se tani për tani nuk do të marrim masa përkatëse ndaj dy vendeve.