Udhëheqësit e BE-së do të kërkojnë të rrisin presionin e sanksioneve ndaj Rusisë për t'i dhënë fund luftës në Ukrainë. Kështu thuhet në deklaratën e tyre pas samitit të komunitetit në Bruksel. Theksohet se "BE-ja do t'i ofrojë mbështetje të palëkundur Ukrainës për aq kohë sa të jetë e nevojshme", raporton AFP.

Ndihma totale e BE-së dhe vendeve anëtare të saj për Kievin që nga fillimi i konfliktit arrin në 67 miliardë euro, nga të cilat furnizimet ushtarake përbëjnë 12 miliardë euro.

Presidenti i Ukrainës, Volodimir Zelenski, ka kërkuar gjatë takimeve dypalëshe me liderët evropianë në Bruksel avionë luftarakë ndërsa vendi i tij përgatitet për ofensivën pranverore të Rusisë. Presidenti francez Emmanuel Macron paralajmëroi se "edhe nëse aleatët evropianë vendosin të dërgojnë avionë luftarakë në Kiev, ata nuk mund të dërgohen në "javët e ardhshme".

Ministri britanik i Mbrojtjes, Ben Wallace, ka përjashtuar mundësinë e dërgimit të avionëve luftarakë në Ukrainë në të ardhmen e afërt, duke thënë se kjo do të ishte si “kalimi nga ngasja e një biçiklete në drejtimin e një makine të Formula 1”, raporton Daily Telegraph.