Komanda ushtarake e Ukrainës ka të ngjarë të ketë urdhëruar një tërheqje taktike të kufizuar nga qyteti i Bahmutit, për të cilin Presidenti Volodimir Zelenski tha se është bërë një pikë "e dhimbshme dhe e vështirë" në betejën për Donbas. Instituti për Studimin e Luftës me qendër në SHBA - ISW raportoi se për shkak të shkatërrimit të urës hekurudhore mbi lumin Bahmutka, ushtria ukrainase u tërhoq nga pjesa verilindore e qytetit të shkatërruar dhe zona e stacionit Stupki. Është shumë herët të thuhet se njësitë ukrainase kanë vendosur të tërhiqen përfundimisht nga Bahmuti. Ata mbeten në bregun perëndimor të lumit, tha ISW.

Pronari i grupit paraushtarak "Wagner", Evgeni Prigozhin, u ankua në “Telegram” se ushtrisë së tij private po i mbaronin municionet dhe paralajmëroi se nëse do të detyroheshin të tërhiqeshin nga Bahmuti, i gjithë fronti rus do të shembet, raportoi Reuters.