Gjatë një konference të përbashkët shtypi me homologun e tij ukrainas Oleksij Reznikov në Odesa, ministri i mbrojtjes Todor Tagarev konfirmoi angazhimin e Bullgarisë për të ofruar mbështetje të gjithanshme për Ukrainën. Tagarev gjithashtu deklaroi se tashmë këtë vjeshtë, vendi ynë mund të fillojë transferimin e pajisjeve të blinduara luftarake në Ukrainë, raportoi BTA, duke iu referuar agjencisë UNIAN. Bëhet fjalë për 100 transportues të blinduar të tipit sovjetik, të cilat ndodhen në magazinat e Ministrisë së Brendshme bullgare. Për t'i dërguar ato duhet të nënshkruhet një kontratë ndërmjet departamenteve përkatëse të dy vendeve dhe më pas marrëveshja të ratifikohet nga parlamenti ynë. Nga ana e tij, ministri ushtarak ukrainas falënderoi Bullgarinë për ndihmën e dhënë dhe shprehu shqetësimin për veprimet e Rusisë në Detin e Zi. Gjatë vizitës së tij në Odesa, ministri i mbrojtjes Todor Tagarev zhvilloi bisedime me përfaqësuesit e diasporës bullgare, njoftoi gjithashtu BTA.