Bullgaria dhe përgatitja e Strategjisë së BE-së për rajonin e Danubit

botuar më 10-03-29 12.01.MD

Javën e kaluar qyteti danubian Vidin u bë mikpritës i një takimi të kryebashkiakëve të Zajçarit të Serbisë - Bozhko Niçiç, Vidinit - Rumen Vidov dhe të Kalafatit të Rumanisë – Mirça Guca (në fotografinë nga e djathta në të majtë).

Foto: BTA

Javën e kaluar qyteti Vidin pranë lumit të Danubit ishte mikpritës i takimit të parë të ekspertëve, nëpunësve bashkiakë, organizatave joqeveritare dhe qytetarëve për përgatitjen e prioriteteve bullgare lidhur me Strategjinë e BE-së për rajonin e Danubit. Dokumenti është një plan për zhvillimin e rajonit të lumit Danub, i cili përbën 20% të territorit të BE-së, kurse në qytetet e tij banojnë 200 milionë veta. Qëllimi i nismës së re evropiane është afrimi ekonomik i vendbanimeve të lidhura gjeografikisht nëpërmjet Danubit. Bullgaria duhet të prezantojë prioritetet e saj dhe projekte konkrete deri më 15 maj të këtij viti. Strategjia bashkon politikanë dhe udhëheqës të shteteve danubiane për zgjerimin e bashkëpunimit territorial, për zhvillimin e infrastrukturës së transportit dhe përmirësimin e cilësisë së jetesës dhe mjedisit. Strategjia nga pala bullgare do të zbatohet nga Organizata e Bashkive Bullgare dhe Ministria e Zhvillimit Rajonal dhe Urbanizimit. Ministri i zhvillimit rajonal Rosen Plevneliev është koordinator i vendit tonë. Marrin pjesë dhe 9 vende të tjera – Gjermania, Çekia, Sllovakia, Austria, Hungaria, Sllovenia, Serbia, Rumania dhe Ukraina. Aktualisht diskutohen dhe sinkronizohen pozitat e vendeve pjesëmarrëse për përgatitjen e Strategjisë. Ajo duhet të miratohet nga KE dhe PE.

Çfarë është kontributi bullgar në projektet e përbashkëta shpjegoi kryebashkiaku i Vidinit Rumen Vidov:

“Mendoj se kemi një strategji kombëtare shumë të mirë, racionale dhe praktike, e cila do të përfshihet në Strategjinë e BE-së për rajonin e Danubit. Ajo është në përputhje me tri shtyllat e strategjisë evropiane – përmirësim të lidhjeve të transportit dhe komunikacionit, mjedisi dhe mbështetje të zhvillimit social dhe ekonomik. Në projektet konkrete të strategjisë sonë përfshihen këto tri shtylla. Një pjesë e madhe e projekteve u përgatitën nga Organizata e Bashkive Bullgare dhe Asociacioni i Qyteteve Danubiane. Jam i bindur se rezultati është shumë i mirë dhe shpresoj se do të miratohet nga KE-ja.”

Megjithëse bullgarët në rajonin e Danubit kanë një standard të ndryshëm të jetesës, projektet e propozuara nga Bullgaria për strategjinë e përbashkët nuk ndryshojnë nga të tjerat, është i mendimit zoti Vidov. Të gjitha ato kanë për qëllim lidhjen midis qyteteve danubiane dhe shteteve danubiane me pjesën tjetër të kontinentit të Evropës.

“Qëllimi kryesor është të përmirësohet infrastruktura dhe si pasojë – klima investuese – sqaroi Rumen Vidov. – Sepse qytetet danubiane mbeten prapa rajoneve të tjera për nga zhvillimi ekonomik dhe social jo vetëm në Bullgari, por edhe në vendet e tjera evropiane, me përjashtim të atyre në rrjedhën e sipërme të Danubit. Prandaj pohoj se këto projekte kanë lidhje me jetën reale dhe kanë për qëllim të barazojnë rajonet e ndryshme. Si një qendër e natyrshme gjeografike të vendeve danubiane fqinje, Vidini u bë mikpritës i një takimi të kryebashkiakëve të Kalafatit të Rumanisë – Mirça Guca, dhe të Zajçarit të Serbisë Bozhko Niçiç. Ne përcaktuam masa praktike për aktivizimin e euroregjionit “Danub 21”. Së shpejti do të krijohet një grup ekspertësh të tri bashkive, do të zhvillohen takime të rregullta për të saktësuar hollësitë e projekteve konkrete. Një prej tyre do të realizohet midis Bullgarisë dhe Serbisë. Në kuadrin e tij do të lidhen korridore të rëndësishme të transportit dhe pikëkalimi kufitar Kalotina me sistemet hekurudhore të dy vendeve.”

Strategjia për rajonin e Danubit pritet të fillojë të funksionojë realisht në vitin 2012. Gjatë periudhës së planifikimit nga viti 2007 deri në vitin 2013 nuk parashikohet financim nga BE-ja. Projektet e gatshme do të financohen nga programet operative dhe fondi i kohezionit për vendin përkatës. Shpresat janë që pas vitit 2014 të ketë mjete posaçërisht për zhvillimin e shteteve dhe qyteteve danubiane.

Përgatiti në shqip: Ekaterina Tarpomanova

По публикацията работи: Cveta Najdenova

Последвайте ни и в Google News Showcase, за да научите най-важното от деня!

Ndaje

Bullgaria dhe përgatitja e Strategjisë së BE-së për rajonin e Danubit

Më shumë nga rubrika

Prej 20 vitesh shkolla "Danubi" ruan të gjallë kujtimin për Bullgarinë në zemrat e nxënësve të saj

Finalja e konkursit FameLab Bulgaria 2025 – pjesë e Festivalit të Shkencës në Sofje

Parlamenti Evropian miratoi raportet për Serbinë dhe Kosovën me theks në të drejtat e bullgarëve

Karnavali i Gabrovos na tërheq me një program të pasur dhe provokime të shumta

Platforma e Qendrës Shkencore Kirill dhe Metodij rrit nivelin e arsimit nëpër shkolla

Për 80 vjet, martesa civile është e vetmja formë e vlefshme martese në Bullgari