Pas mbledhjes së të premtes që zgjati 17 orë Parlamenti Bullgar miratoi përfundimisht buxhetin kombëtar të 2015-ës.

Në Bullgari mendohet se ky është ligji më i rëndësishëm i vitit, sepse nga shpërndarja e mjeteve varen shëndetësia, drejtësia, siguria, arsimi, ekonomia, çështjet sociale dhe rreth 1 të katërtën e popullsisë që merr direkt para nga buxheti shtetëror.

“Nuk pretendoj se ky është buxhet i mirë, ky është buxheti më i miri i mundshëm”, u shpreh Ministri i Financave, Vlladisllav Goranov, duke sqaruar se qëllimi kryesor është stabiliteti dhe siguria, të cilët mungonin dy vite të tëra, pasi vendi ishte përfshirë nga trazira politike e sociale.

Stabiliteti dhe siguria janë nocione të cilat janë të kundërta në kuptimin e “reformave”. Në fakt, reforma janë njëra nga gjërat e para që premtoi qeveria e koalicionit e Bojko Borisovit. Por ky synim i qeverisë nuk pasqyrohet financiarisht në buxhet. Ekspertët sqarojnë se në vend të parë do të miratohen ndryshimet dhe më pas do të kërkohet financimi i reformave. Kjo qasje duket e arsyetueshme dhe ishte vlerësuar nga agjencia e normimit “Fitch”, e cila në ditën e miratimit të buxhetit rikonfirmoi normën e mirë të Bullgarisë – BBB me perspektivë të qëndrueshme.

E vetmja masë radikale është shkurtimi i shpenzimeve për pagat e administratës publike me 10 për qind. Efikasiteti i kësaj mase vihet në dyshim nga shumica e mbikëqyrësve, bile nga disa ministra në qeveri.

Në buxhetin e 2015-ës u parashikua që deficiti prej 3.7 për qindësh i palejueshëm nga Brukseli të pakësohet deri në 3 për qind të PBB-ës. Janë të planifikuara të ardhura shtetërore deri në 39.8 për qind nga PBB-ja. Qeveria do të marrë borxh të ri në vlerë 4.2 mlrd euro dhe borxhi publik do të arrijë deri në 30 për qind nga PBB-ja që është gjë normale. Shqetësuese është se parashikohet që rritja e ekonomisë të bjerë nga 1.6 për qind sivjet deri në 0.8 për qind vitin tjetër. Pra, do të kemi nevojë për rritje të dyfishtë për t’u afruar ekonomikisht vendeve të tjera të BE-së. Mirëpo, biznesi pret shifra më të mira, po ashtu dhe Ministri i Ekonomisë Bozhidar Llukarski u shpreh pozitivisht për rritjen e ekonomisë. Po ashtu parashikohet se vitin tjetër deflacioni i regjistruar gjatë 2014-ës, i cili e vret biznesin, më së fundi do të zëvendësohet me inflacionin e shëndoshë prej rreth 1 për qind.

Përgatiti në shqip: Anna Kapitanova