Transparency International hartoi raportin e parë evropian për një studim gjithëpërfshirës mbi lobimin dhe shkallën e mbrojtjes së procesit politik nga ndikimi i paligjshëm. Studimi është bërë nga përfaqësitë e “Transparencës pa kufij” në 19 vende të BE-së. Janë studiuar dhe po ashtu Komisioni Evropian, Parlamenti Evropian dhe Këshilli i BE-së. Për fat të keq, Bullgaria është në krye të klasifikimit për praktika jo transparente të lobimit.

“Përfundimi themelor i studimit është se lobimi jo i rregulluar në Evropë shkakton jo transparencë, konflikt interesash dhe korrupsion, vë në dukje koordinatorja e Asociacionit “Transparenca pa kufij”, znj. Linka Toneva. – Shkalla e transparencës dhe e lobimit jo të drejtë regjistrohet nga 0 deri në 100. Shkalla mesatare, e regjistruar në bazë të studimit të vendeve evropiane dhe institucioneve evropiane, është mezi 31 për qind. I vetmi vend në shkallën mbi 50 është Sllovenia. Ndërsa Lituania dhe Britania e Madhe janë fiks në shkallën 50. Kjo do të thotë se bien në zonën e garancive jo të mjaftueshme, por njëkohësisht aty vërehen praktika kundër lobimit jo të drejtë. Të gjitha të tjerat janë në shkallën nën 50.”

Bullgaria, me 25 për qind të sajat është “e mbrojtur” vetëm me një të katërtën e lobimit jo të drejtë. Në këtë grup bien po ashtu Gjermania, Portugalia dhe Italia. Në fund të klasifikimit janë Hungaria dhe Qiproja.

“Sipas treguesit të transparencës së lobimit Bullgaria ka 13 për qind, thekson znj. Toneva. – Mesatarja është 26 për qind. Kjo është për shkak të jo rregullimit të procesit të lobimit në vend. E keqja është se në pjesën dërmuese mbi procesin legjislativ dhe pushtetin ekzekutiv nuk ka kontroll publik. Për sa i përket treguesit të ndershmërisë së aktiviteteve lobuese, Bullgaria është po ashtu me 25 për qind. Ky rezultat i keq ka të bëjë me deficitet e dukshme në një sërë ligjesh lidhur me fushën e lobimit. Shoqëria gjerësisht mendon se interesa të dhënë ekonomikë ndikojnë mbi jetën politike e ekonomike të Bullgarisë.”

Nga 19 vendet e studiuara mezi 6 kanë aplikuar disa rregulla për aktivitetet lobuese. Këtu bëhet fjalë për Austrinë, Francën, Irlandën, Lituaninë, Poloninë, Slloveninë dhe Britaninë e Madhe.

“Komisioni Evropian është ndër institucionet e vlerësuara lartë – mbi 50 për qind, thotë znj. Toneva. – Parlamenti Evropian është me 30 për qind dhe Këshilli i BE-së – me 19 për qind. Në BE u hap regjistri i organizatave të cilat kontaktojnë me institucionet evropiane. Ja pse rezultati i Komisionit Evropian është aq i lartë, sepse ai zbaton rreptë regjistrin e lartpërmendur.”

Nga Transparency International rekomandojnë që institucionet shtetërore të BE-së të aplikojnë rregulla gjithëpërfshirëse për lobimin, të aplikojnë po ashtu regjistra të detyrueshëm të lobistëve, si dhe “një dosje legjislative”. Kjo e fundit i bën publike të gjitha format e ndikimit të jashtëm mbi legjislacionin dhe të gjitha kontaktet mes lobistëve dhe personave në pozita publike.

Përgatiti në shqip: Anna Kapitanova