Po vazhdojnë festimet kombëtare me rastin e jubileut të basit të madh bullgar Nikolla Gjuzelev, të cilat filluan më 17 gusht, kur u mbushën 80 vjet nga lindja e tij dhe 50 vjet veprimtari skenike të këngëtarit dhe piktorit të njohur. Priten koncerte, ekspozita, prezantime librash dhe një dokumentar i ri i regjisorit Oleg Kovaçev në skenat, ku Gjuzelevi ka kënduar, me pjesëmarrjen e muzikantëve, me të cilët ka punuar dhe të cilëve u ka dhënë mësime.

Nikolla Gjuzelev ka kënduar në skenat e mëdha të operës në Evropë, në Amerikën Veriore dhe në atë Jugore, në Australi, Japoni dhe ka qenë partner i emrave më të mëdhenj në këtë art.

Për festimet dhe programin e tyre, na tregoi Anna Maria Gjuzeleva, bashkëshorte e basit të madh bullgar:

“E themeluam fondacionin kulturor “Nikolla Gjuzelev” me miq dhe veprimtarë të kulturës në bashkëpunim me Pallatin Kombëtar të Kulturës, Operën e Sofjes, Akademinë Bullgare të Shkencave etj. Sivjet morëm përkrahje të konsiderueshme financiare nga Ministria e Kulturës, pa të cilën nuk do të mund të realizonim gjithçka.”

“Bashkia Pavlikeni organizoi festime të mëdha dhe e quajti teatrin e madh veror në qytet me emrin e tij. Festimet janë më 16 shtator, kurse më 20 shtator do të ketë një koncert të madh, kushtuar Gjuzelevit, organizuar nga Akademia Bullgare e Shkencave. Do të marrin pjesë shumë prej akademikëve në fushën e artit, në sallonin e madh, kurse në sallonin e vogël do të hapet një ekspozitë. Do të jenë të pranishëm Svilen Rusev, Kryetari i Akademisë Bullgare të Shkencave akademik Stefan Vodeniçarov, Ljudmill Stajkov, Pllamen Xhurov me Solistët e Sofjes, Ivan Drennikov. Pas kësaj është Parma, ku do të ketë koncert më 22 shtator, bashkë me Vlladimir Stojanovin dhe Mikele Petruzi. Opera e Sofjes ia kushton Gjuzelevit spektaklin “Don Karlos” më 29 tetor, me pjesëmarrës bullgarë dhe të huaj, kurse Roberto Skanduci do të këndojë në rolin e Filipit. Pas kësaj është Roma më 3 nëntor, në Institutin Kulturor Bullgar dhe në Ambasadë. Do të ketë koncert, projektime filmash, paraqitje të librave të reja.

Fondacioni “Nikolla Gjuzelev” bashkë me fondacionin “13 shekuj Bullgaria” botoi një monografi të Gjuzelevit me fotografi të roleve të tij, pikturave dhe teksteve kushtuar atij. Në Strasburg do të ketë një koncert kushtuar basit të madh më 18 nëntor. Më 2 dhjetor në Pallatin Kombëtar të Kulturës do të hapet një ekspozitë prej afishesh dhe fotografish të roleve të tij të ndryshme, do të paraqitet gjithashtu monografia dhe romani i ri biografik i Vlladimir Gaxhevit kushtuar Gjuzelevit.

Më 13 dhjetor në sallën Nr 1 të Pallatit Kombëtar të Kulturës është koncerti më i madh jubilar në kuadrin e festivalit të Vitit të Ri “Kalorësi i Operës”. Ai do të jetë me pjesëmarrje italiane dhe bullgare dhe kuptohet do të këndojnë Vlladimir Stojanov, Nikollaj Karnollski, Marian Jovanovski – nxënës të tij, si dhe Bojko Cvetanov, Kalludi Kalludov, Orlin Anastasov dhe Daniella Djakova. Françeska Patane është sopranoja italiane, i ati i së cilës ishte një prej dirigjentëve më të mëdhenj operistikë Xhuzepe Patane. Dirigjenti i koncertit do të jetë Donato Renceti, i cili ka punuar me Gjuzelevin. Koncepti është që të marrin pjesë nxënës të tij, si dhe kolegë dhe dirigjentë, të cilët kanë punuar me Nikollën. Tani për shembull jemi duke xhiruar një film kushtuar tij dhe do të intervistojmë Renato Bruzon, Mirela Frenin, Katja Riçarellin, Hristina Angellakovën etj.”

Përgatiti në shqip: Vesella Mançeva