Hoyt Brian Yee: Perspektiva evropiane e Kosovës dhe e regjionit është prioritet për SHBA

Pas vizitës së tij në Serbi zëvendës ndihmës Sekretari i SHBA-së, përgjegjësi për çështjet evropiane dhe euroazi, z. Hoyt Brian Yee u takua në Prishtinë me Presidentin e Kosovës z. Hashim Thaçi dhe diskutoi me të rolin e SHBA-së për perspektivën rajonale dhe euroatlantike të shtetit më të ri në Ballkan. Në faqen zyrtare të Presidentit të Kosovës ka informacion se në kuadrin e takimit me diplomatin amerikan Thaçi ka nënvizuar se vazhdimi i mbështetjes së SHBA-së për Kosovën dhe rajonin, mbetet çelës për paqe e stabilitet të qëndrueshëm. Nga ana e tij Hoyt Brian Yee ripohoi përkrahjen e SHBA-së për Pristinën, duke thënë se “perspektiva evropiane e Kosovës dhe e tërë rajonit është ndër prioritetet amerikane”.

Bullgaria dhe Rumania do të regjistrojnë në një bazë të të dhënave transitin e shtetasve të vendeve jashtë BE-së

Parlementi Evropian pranoi krijimin e një baze të dhënash, ku do të regjistrohen njerëzit nga shtetet jashtë BE-së, të cilët kalojnë kufijtë e Shengenit. Në sistemin e ri evropian me informacion për udhëtimet dhe për lejimet e tyre (ETIAS) do të përfshihen Bullgaria dhe Rumania. Në këtë sistem do të regjistrohen emrat dhe të dhënat nga dokumentet e lidhura me udhëtimin përkatës, shenjat e gishtave, të dhënat për fytyrat, vendi dhe data e kalimit të shtetasve të huaj, kështu edhe refuzimet për akses në hapësirën e Shengenit. Sistemi do të zëvendësojë vulosjen e pasaportave dhe do të lehtësojë kalimin e kufijve dhe zbulimin e shkelësve. Pritet se ai do të ndihmojë zbulimin e të huajve, të cilët qëndrojnë në territorin e Bashkimit Evropian në shumë se afati i lejuar.

Policia turke arrestoi 58 të huaj për shkak të dyshimeve për lidhjet e tyre me “Shtetin Islamik”

Policia turke zhvilloi një operacion kundër mbështetësve të dyshuar të “Shtetit Islamik” në Stamboll. Gjatë tij u arrestuan 62 veta, 58 prej të cilëve janë shtetas të huaj. Ata mund të deportohen për në atdhe. “Shteti Islamik” është akuzuar për shumë sulme në territorin e Turqisë në vitet 2015 dhe 2016, gjatë të cilave ishin vrarë qindra njerëz.

9,8 miliardë dollarë do të harxhojë Rumania mbrojtje deri në vitin 2026

Flota ushtarake e Rumanisë duket si “një lodër” në krahasim me atë të Rusisë në Detin e Zi, tha ministri rumun i mbrojtjes Mihai Fifor. Mirëpo ai deklaroi se shteti i tij po kërkon mundësi për të forcuar aftësitë e tij mbrojtëse. Deri më 2026-ën Rumania do të harxhojë 9,8 mlrd. dollarë për armatosjen e ushtrisë së vet.

117 anëtarë të “Shtetit Islamik” janë kthyer në Kosovë

117 janë kosovarët, të cilët u janë bashkuar militantëve në frontet e luftës të ISIS-it dhe të cilët tashmë janë kthyer në atdhe. Të gjithë ata kanë qenë në territoret e Irakut apo Sirisë. Sipas autoriteteve shumë prej të kthyerve mbeten ende të përkushtuar ndaj xhihadit të dhunshëm dhe prandaj e rrezikojnë sigurinë e shtetit.

Reshjet e borës bllokuan Serbinë Perëndimore

Vala e të ftohtit të shoqëruar me reshje të borës bllokuan Serbinë Perëndimore, ku shumë familje mbetën pa korrent. Pemët e rrëzuara vështirësuan qarkullimin rrugor. Në bashkinë Nova Varosh shtresa e dëborës arriti një metër.

Përpiloi: Miglena Ivanova
Përgatiti në shqip: Jordanka Ivanova