Kryetari i Këshillit Evropian Donald Tusk deklaroi në Sofje se në Samitin BE-Ballkani Perëndimor nesër për herë të parë që prej 15 vitesh liderët e regjionit do të takohen sy më sy me homologët e tyre nga BE-ja. “Duhet të demonstrojmë këtu dhe tani se interesohemi për zhvillimin ekonomik të Ballkanit, sepse kjo është në interes të BE-së dhe qëllimi i samitit në Bullgari është që ta ripohojmë” – tha z. Tusk. Lidhur me taksat doganore kundër prodhuesve evropianë të çelikut dhe aluminit, që gjithashtu është një prej temave të diskutuara në Sofje ai i dërgoi kritika të ashpra Presidentit amerikan Donald Trump. Duke theksuar se një prej motiveve të SHBA-së për të bërë këtë hap është siguria e tyre kombëtare, Tusk komentoi se është absurd që Presidenti amerikan ta konsiderojë Bashkimin Evropian si armik.