Partia Socialiste Bullgare (BSP) kërkoi krijimin e një komisioni në Parlament me rastin e skandalit lidhur me ndërprerjen e transmetimit të programit qendror të Radios Kombëtare Bullgare (BNR) “Horizont” më 13 shtator për 5 orë. Liderja e socialistëve Kornelia Ninova filloi të flasë për diktaturë në veprim. “Ndërprerja e sinjalit të BNR-së është një rast pa precedent në historinë e Bullgarisë. Ne ngulim këmbë për përgjegjësi politike dhe për të vërtetën deri në fund”, tha Ninova. Deputetët e GERB-it deklaruan se nuk ka nevojë për krijimin e një komisioni të tillë në Parlament. “Kjo që ne mund të bëjmë është ta ndryshojmë legjislacionin”, vuri në dukje deputeti i GERB-it Toma Bikov. Mirëpo, si rrjedhim i kësaj Kryeministri Bojko Borisov deklaroi se GERB do ta përkrahë kërkesën e BSP-së dhe përveç kësaj do të propozojë që Parlamenti të marrë vendim për kontrollimin e tërë menaxhimit të deritanishëm të BNR-së nga Kontrolli i Lartë i Shtetit, si një organ i pavarur suprem.