Sot është E Enjtja e Madhe, dita e katërt e Javës së Madhe. Kjo ditë lidhet me Darkën e Fundit në të cilën u vendos fshehtësia e Kungimit të Shenjtë. Përderisa apostujt po hanin Krishti e mori bukën, e bekoi, e theu, ua shpërndau dishepujve të Tij dhe tha: “Merrni, hani, ky është trupi im!” Pastaj ai ngriti gotën e falënderoi, ua dha atyre dhe të gjithë pinë prej saj. Atëherë ai u tha: “Ky është gjaku im i Dhiatës së Re, i cili është derdhur për ju dhe për shumë veta për faljen e mëkateve.”

E Enjtja e Madhe është dita më e rëndësishme e Javës së Madhe. Ajo simbolizon fillimin e përgatitjes për Pashkët.

Gjatë ditëve të Javës së Madhe, Kisha iu drejtohet besimtarëve të bëhen të vetëdijshëm ndaj vuajtjeve të Shpëtimtarit, të përjetojnë të gjithë atë, të cilën Biri i Zotit e ka duruar për Njerëzimin. Ungjijtë e Apostujve që lexohen në shërbesat fetare na ndihmojnë të përjetojmë këto ngjarje të përmbushura me shumë simbolikë. Jesu Krishti është fytyra e dytë e Trinisë së Shenjtë Ai erdhi ndër njerëzit i udhëhequr vetëm nga dashuria ndaj fisit njerëzor.