Kancelari gjerman Olaf Scholz, presidenti amerikan Joe Biden, kreu i shtetit francez Emmanuel Macron dhe kryeministri britanik Boris Johnson bënë thirrje për përmbajtje nga veprimet ushtarake pranë centralit bërthamor “Zaporizhzhie” dhe për një vizitë të shpejtë nga ekspertët e Agjencisë Ndërkombëtare të Energjisë Atomike. Në një telefonatë konferente, katër udhëheqësit diskutuan sigurinë e termocentraleve bërthamore në Ukrainë dhe nevojën për t'i siguruar ato, raportoi Reuters. Presidentët Macron dhe Putin arritën një marrëveshje në parim për një mision të Agjencisë Ndërkombëtare të Energjisë Atomike për të vizituar centralin bërthamor “Zaporizhie”. Kështu, pas saktësimit të detajeve teknike, inspektorët do të mund të analizojnë në vend gjendjen e centralit. Gjatë bisedës së tyre, Biden, Johnson, Macron dhe Scholz konfirmuan angazhimin e tyre të vendosur për të mbështetur Ukrainën kundër agresionit rus.

Kievi hodhi poshtë mundësinë që të ishte përfshirë në shpërthimin e makinës me bombë që vrau Darja Dugina, vajza e ndihmësit të presidentit rus Aleksandër Dugin dhe një mbështetëse e pushtimit të Ukrainës. “Ne nuk jemi një shtet kriminal si Federata Ruse dhe aq më pak terroristë”, tha këshilltari i presidentit ukrainas, Mihail Podoljak, për televizionin ukrainas “Liga”. Sipas Podoljak, bombardimi dëshmon për luftën për pushtet dhe ndikimin e grupeve të ndryshme në Rusi. Më vonë, ish-deputeti në Dumën ruse, Ilja Ponomarjov, tha se pas aktit qëndrojnë partizanë rusë nga Ushtria Republikane Kombëtare. “Ne e shpallim presidentin Putin një uzurpator të pushtetit, një kriminel lufte, që ka ndryshuar Kushtetutën, i cili gjithashtu po bën një luftë vëllavrasëse midis popujve sllavë dhe po dërgon ushtarë rusë në një vdekje të sigurt dhe të pakuptimtë”, thuhet në një pjesë të deklaratës së organizatës.

Guvernatori i Sevastopolit, Mihail Razvozhaev, informoi se mbrojtja ajrore ka zmbrapsur një sulm të ri në aeroportin ushtarak Belbek aty pranë. Ushtria ruse ka goditur Nikolaev dhe Nikopol, të vendosura jo shumë larg centralit bërthamor “Zaporozhie”.