Pas një sulmi tjetër masiv me raketa ruse mbi objektivat civile ukrainase më 5 dhjetor, zëdhënësi i Forcave Ajrore të Ukrainës Juri Ignat paralajmëroi se një tjetër valë raketore ruse pritet më 6 dhjetor. Ai u bëri thirrje qytetarëve që të mos bëjnë panik dhe të përgatiten për evakuim në rast alarmi ajror. Ignat njoftoi se më 5 dhjetor, më shumë se 60 nga 70 raketat ruse të lëshuara u rrëzuan, raporton UNIAN.

Policia kufitare moldaviane zbuloi një raketë pranë kufirit me Ukrainën, njoftoi Ministria e Jashtme në Kishinau. Raketa ra në një pemishte pranë qytetit të Briçani, në kufi me Ukrainën.

Sulmet ruse të 5 dhjetorit pasuan një sulm të suksesshëm me dron ukrainas në bazën ushtarake Engels në rajonin e Saratovit. Aeroporti ndodhet 750 kilometra larg kufirit ukrainas dhe aty ruhen edhe armë bërthamore. Dy bombardues strategjikë Tu95M, të cilët Rusia i përdor për sulme kundër Ukrainës, janë dëmtuar, shkruajnë blogerët ushtarakë rusë. Një dron goditi gjithashtu një aeroport ushtarak rus pranë Brjansk.

Natën e 6 dhjetorit, një dron goditi depot e karburantit dhe shkaktoi një zjarr në shkallë të gjerë pranë aeroportit rus në Kursk, nga ku ngrihen edhe avionët ushtarakë.