Vladimir Putin ka urdhëruar një armëpushim përgjatë vijës së kontaktit luftarak në Ukrainë, sot nga ora 12:00 deri në orën 24:00 të 7 janarit, njoftoi departamenti ushtarak rus, cituar nga TASS. "Meqenëse shumë qytetarë ortodoksë jetojnë në zonat e armiqësive, ne i bëjmë thirrje palës ukrainase që t'u japë atyre mundësinë për të marrë pjesë në mbrëmjen e Krishtlindjeve dhe në shërbesat e Lindjes së Krishtit," thuhet në dokumentin e nënshkruar nga ai.

Në fjalimin e tij të mbrëmjes, Volodimir Zelenski tha: "Ata duan të përdorin Krishtlindjet si një mbulesë për të ndaluar lëvizjen e djemve tanë në Donbas për një kohë dhe për të sjellë pajisje, municione dhe ushtri të mobilizuar më afër pozicioneve tona. Kjo do të çojë në një rritje tjetër të humbjeve. E gjithë bota e di se Kremlini përdor qetësimin e luftës për ta vazhduar atë me energji të përtërirë.” Mihajllo Podoljak, një këshilltar i presidentit ukrainas, e përshkroi si "hipokrizi" dhe "gjest propagandistik" armëpushimin e shpallur me rastin e Krishtlindjeve Ortodokse dhe akuzoi Moskën se dëshiron të fitojë kohë, raporton Reuters. "Rusia duhet të largohet nga territoret e pushtuara dhe vetëm atëherë do të ketë një armëpushim të përkohshëm," vuri në dukje ai në Twitter. “Putini ishte gati të bombardonte spitalet, kopshtet dhe kishat më 25 dhjetor dhe në ditën e Vitit të Ri”, komentoi nga ana e tij Joe Biden urdhrin dhe supozoi se presidenti rus po përpiqet të marrë frymë për veprimet e tij ushtarake.