Për të dytën ditë, mbi 40 orë, vazhdon operacioni për nxjerrjen e kufomave dhe të të mbijetuarve nga pallati i shembur 9-katësh në qytetin ukrainas Dnipro. Sipas autoriteteve lokale, të vdekurit janë 35. Mes të vrarëve nga raketa ruse ishin edhe dy fëmijë. 39 civilë u shpëtuan. 75 janë të plagosurit, nga të cilët 14 fëmijë. Kërkimet në rrënojat po vazhdojnë. Janë të zhdukur 35 banorë të pallatit. Natën e së hënës, raketat ruse sulmuan sërish objektiva civilë në Herson dhe Zaporozhie. Mes të plagosurve janë edhe dy fëmijë.

Me rastin e sulmit me raketa, kur u godit blloku i banimit në Dnipro, Ministria ruse e Mbrojtjes raportoi të dielën se "Të gjitha objektivat e synuara u goditën. Qëllimet e (sulmit) u arritën", njoftoi TASS. Në një intervistë për televizionin shtetëror Rossija-1, lideri rus Vladimir Putin deklaroi gjithashtu se "Dinamika është pozitive. Gjithçka po zhvillohet në kuadër të planit të Ministrisë së Mbrojtjes dhe Shtabit të Përgjithshëm".

Këshilltari i presidentit ukrainas, Mihailo Podoljak, shkroi në Twitter se 77% e të burgosurve rusë të rekrutuar nga grupi "Wagner" dhe të dërguar në Ukrainë, janë tashmë jashtë sistemit. Nga 38 244 të burgosur të mobilizuar, 29 543 janë raportuar si të vrarë, të plagosur ose të zhdukur.