Disa kanale televizive dhe stacione radio në Moskë dhe në rajonin e Leningradit të Rusisë, si dhe në Krime, transmetuan sinjale të një sulmi raketor. Informacioni vjen nga radio bjelloruse Mir, e cila njofton në kanalin e saj zyrtar telegram për ndërprerjen me qëllim të keq të transmetimit të kanaleve ruse 2x2 dhe TNT4. Ndërkohë agjencia TASS njofton për tre dronë që ranë në rajonin e Belgorodit, njëri prej të cilëve u përplas me një ndërtesë banimi.

Më herët këtë mëngjes, Ukraina shpalli një alarm ajror në rajonet Poltava, Harkov dhe Dnipropetrovsk. Situata ushtarake mbetet e rëndë në zonën e qytetit Bahmut, i cili është në qendër të ofensivës ruse në Ukrainën Lindore. Sipas komandantit të forcave tokësore të Ukrainës, gjeneral-kolonel Oleksandër Sirski, megjithë humbjet e konsiderueshme, njësitë më të përgatitura sulmuese të formacionit ushtarak “Wagner” po përpiqen të çajnë mbrojtjen e trupave ukrainase dhe të rrethojnë qytetin, transmeton BTA. Njësitë ruse po përpiqen të ndërpresin linjat e furnizimit të mbrojtësve ukrainas të Bahmut, gjë që do t’i jepte Rusisë fitoren e saj të parë të madhe në më shumë se gjysmë viti dhe do t’i hapte rrugën kapjes së qendrave të fundit urbane në rajonin e Doneckut. Sipas analistit ushtarak ukrainas Oleg Zhdanov, pjesa jugore e Bahmutit është e vetmja zonë nën kontrollin e Ukrainës, ndërsa situata në të gjitha të tjerat është e paparashikueshme.