Gjatë javës së kaluar, forcat ruse humbën më shumë se 1100 njerëz në luftimet për Bahmut, tha presidenti ukrainas Vollodimir Zelenski, cituar nga Reuters. “Që nga 6 marsi, ne arritëm t’i shkaktonim Rusisë humbje të pakthyeshme të më shumë se 1100 ushtarëve të armikut vetëm në drejtimin eBahmutit”, tha Zelenski në një adresë video. Ai shtoi se Rusia pësoi gjithashtu 1500 “humbje sanitare”, që do të thotë luftëtarë që u plagosën dhe nuk do të kthehen në radhët.

Një nga komandantët e njësive ukrainase në qytetin gjysmë të rrethuar, Denis Jarosllavski, në transmetimin e televizionit ukrainas “Espreso TV”, njoftoi se korridori përmes të cilit furnizohen është vetëm 4 km i gjerë dhe se për çdo shtëpi zhvillohen beteja të ashpra në rrugë.

“Situata në Bahmut është shumë e vështirë, forcat e armatosura ukrainase po hedhin rezerva të pafundme”, tha kreu i kompanisë paraushtarake “Wagner “në kanalin e tij telegram. Sipas Evgenij Prigozhin, krijuesi i formacionit paraushtarak, sa më shumë që rusët afrohen në qendër të qytetit, aq më të rënda bëhen luftimet. “Aq më shumë artileri dhe tanke qëllojnë kundër nesh”, njofton ai dhe shton se po ecin përpara.

Për televizionin shtetëror ukrainas, zëdhënësi i forcave të armatosura Sergej Çerevatij njoftoi se ushtria ruse aktualisht po përqendron forcat e saj kryesore për një ofensivë në zonën e Liman dhe Kupjansk.