Lideri i “Vëzrazhdane” Kostadin Kostadinov ka bërë të ditur se po i paraqesin kërkesë për mosbesim qeverisë së përkohshme të Dimitër Gllavçevit. 67 deputetë të “Vëzrazhdane”, Partia Socialiste Bullgare (BSP) dhe “Ka një popull të tillë” (ITN) kanë nënshkruar projektvendimin, raportoi gazetarja e BNR, Maria Fileva. Për ta nënshkruar kërkesën ishin ftuar edhe PP-DB, por ata refuzuan. Kërkesa është motivuar nga “ndërhyrja e paprecedentë politike”, e cila vë në dyshim mundësinë e organizimit të “zgjedhjeve të ndershme”. "Fjalë për fjalë një javë pas emërimit të këtij kabineti, pas një deklarate të kryetarit të GERB-it, Bojko Borisov, ministri i punëve të jashtme është zëvendësuar ose propozuar për zëvendësim. Kjo krijon një premisë objektive për të dyshuar në drejtësinë e votimit", tha Kostadinov.

• Ministri i Bujqësisë u zëvendësua disa ditë pas marrjes së detyrës

• Kryeministri në detyrë propozoi zëvendësimin e ministrit të jashtëm në detyrë

Më herët, kryetarja e BSP-së, Kornelija Ninova, tha se mocioni i mosbesimit do të jepet vetëm nëse presidenti nuk e zëvendëson kryeministrin në detyrë Dimitër Gllavçev.

Para BNR-Plovdiv, profesorеsha e së drejtës kushtetuese në Universitetin e Sofjes "Shën Kliment Ohridski" Natalija Kiselova komentoi se nuk mund të kërkohet mocion mosbesimi për një kabinet zyrtar. Ajo kujtoi se organi që emëron është organi që shkarkon - në këtë rast presidenti.