Për herë të parë në Bullgari për postin e presidentit ngrihet kandidatura e një gruaje – Meglena Kuneva. Ajo ka gradë shkencore në shkencat juridike, ka specializuar në universitete me famë botërore në SHBA dhe Britaninë e Madhe dhe është euro komisarja e parë bullgare. Në vitin 2008 Meglena Kuneva mori çmimin e “European Agenda” për komisare të vitit dhe të edicionit “European Voice” për evropiane të vitit. Aktualisht Meglena Kuneva është kryetare e Bordit të drejtorëve të Qendrës për politika evropiane dhe këshilltare speciale e zëvendës presidentit të Komisionit Evropian dhe komisar i transportit Sijm Kalas.

Nominimi i saj për presidente u ngrit nga Komiteti i Iniciativës, në të cilin marrin pjesë njerëz të artit, të rretheve akademike, figura shoqërore dhe ministra të qeverisë së Lëvizjes Kombëtare Simeon Sakskoburggotski. Pavarësisht nga kjo Meglena Kuneva shpalli se po hyn në garën për president si “kandidat jopartiak”. “Nuk kërkoj përkrahje partiake, nuk angazhohem me angazhime partiake dhe nuk shpreh vullnetin e lobive. Partitë e bëjnë politikën, kurse populli – burrin e shtetit” – tha ajo. Megjithëse përpiqet të përfaqësojë vetëm kombin, kandidat-presidenti duhet të ketë ndonjë platformë, me ide, të cilat afrohen me një prej dy pjesëve të spektrit politik, e komentoi mesazhin politologu Boris Popivanov – profesor në Universitetin e Sofjes “Shën Klementi i Ohrit”.

“Meglena Kuneva dhe ekipi i saj përpiqen të fillojnë një fushatë sipas modelit amerikan. Ajo vetë mbështetet mbi përvojën e Barak Omabës, i cili fitoi me sukses të madh zgjedhjet për president amerikan, por përvoja amerikane dhe ajo bullgare janë dy gjëra krejt të ndryshme. Fushata e fuqishme në SHBA është dialog me popullin dhe jo dialog me partitë. Në Evropë, ku jemi ne, situata është e ndryshme. Këtu partitë politike e shprehin vullnetin e popullit dhe politikanët më të rëndësishëm janë politikanët partiakë. Mbi këtë fondament është themeluar bashkimi evropian.”

“Do të marrë pjesë në garën për president, sepse këto zgjedhje do të jenë diçka më shumë se konkurrencë për postin e presidentit. Ato do të jenë një referendum për zhvillimin e Bullgarisë, për tërë udhëheqjen e saj”, deklaroi gjatë nominimit të vet Meglena Kuneva.

“Kur të bëhet fjalë për një referendum, kushtuar drejtimeve të zhvillimit të Bullgarisë, atëherë bëhet aluzion me qeverinë, me pushtetin ekzekutiv – vazhdon komentin e vet Boris Popivanov. Kështu qe, duke folur për një referendum të tillë, njeriu fton jo vetëm qytetarët, ai fton partitë politike për të deklaruar se cilën anë përkrahin – a janë për ndryshimin e drejtimit, apo jo. Në këtë kuptim vetë kërkimi i referendumit është një ofertë ndaj forcave politike për ta përkrahur kandidaturën e saj. Beteja do të jetë “pro” ose “kundër” politikës së kryeministrit Bojko Borisov, pavarësisht nëse ai do të kandidojë për president apo jo.”

“Sot partia ime është Bullgaria”, deklaroi Meglena Kuneva. Sipas fjalëve të saj arsimi, shëndetësia, kultura, madje ekonomia nuk mund të vihen djathtas ose majtas.

“Kur të bëhet fjalë për politikën, si në sferën e shëndetësisë, ashtu dhe në sferën e arsimit, vendimet politike kanë ngjyrë – është i mendimit politologu Boris Popivanov. – Ato janë të majta, të djathta, ose centriste, si politika. Njerëzit do ta kuptojnë më mirë Meglena Kunevën, në qoftë se ajo deklaron qartë në cilën pjesë të spektrit politik janë vendimet e saj.”

Përgatiti në shqip: Vesella Mançeva