Nga 4 deri më 6 shtator do të zhvillohet edicioni i XIII-të i Tubimit Ndërkombëtar në kompleksin arkitektural dhe etnografik “Etëra” të qytetit të Gabrovos. Ngjarja është nën patronazhin e kryetares së Kuvendit Popullor Cecka Caçeva dhe organizohet nga Ministria e Kulturës, Bashkia e Gabrovos (Bullgari Qendrore) dhe kompleksi “Etëra”.

“Kemi shumë ekspozues, që është e gëzueshme për ne – shpjegoi Bllagovesta Bozhinova nga kompleksi arkitektural dhe etnografik “Etëra”. – Do të prezantojmë pothuaj 80 mjeshtër nga tërë vendi, kështu edhe një numër rekord të pjesëmarrësve ndërkombëtare. Vizituesit tanë do të mund të shikojnë mjeshtër nga Japonia, Koreja e Jugut, Bjellorusia, Azerbajxhani, Rumania, Rusia, Skocia, Ukraina, Italia dhe Siria, të cilët do ta dhurojnë një kolorit të veçantë tubimit të sivjetshëm.  Konkurrimi tradicional sivjet do të jetë për mjeshtër të gdhendjes së drurit. Fituesi do të marrë çmimin “Këmbora e argjendtë” dhe të drejtën të prezantojë një ekspozitë të vetë në muzeun e kompleksit “Etëra”. Përveç kësaj për mysafirët tanë kemi përgatitur një program të pasur folklorik me pjesëmarrjen e interpretuesve si Nikollina Çakërdëkova dhe ansambli i kërcimtarëve, i njohur si “Nevrokopski”. Në program është përfshirë gjithashtu spektakli i Teatrit Shtetëror të Kukullave të qytetit Stara Zagora “Magjia Folklorike.”

E reja sivjet është takimi i parë kombëtar i mjeshtërve-prodhues të veglave muzikore me pjesëmarrjen e posaçme të Orkestrës për Muzikë Popullore të Radios Kombëtare Bullgare. Organizatorët e tij janë kompleksi arkitektural dhe etnografik “Etëra ” dhe kompania muzikore “Rodoljubie” (atdhedashuria).

“Takimi do të ketë karakter konkurrimi – shpjegoi Bllagovesta Bozhinova. – Në jurinë e posaçme marrin pjesë disa nga instrumentistët më të mirë të Orkestrës së Radios Kombëtare. Ata do të shpallin fituesit në pesë kategori – gajde, kavall, tambure, daulle dhe mandolinë me tri tela. Ngjarja do të përfundojë me një konkurrim muzikor në qiell të hapur më 5 shtator. Çelja solemne e Tubimit Ndërkombëtar të Zanateve Popullore do të zhvillohet gjithashtu më 5 shtator, të shtunën, në orën 11.00 para dreke në luginën para muzeut.”

Sivjet tubimi u është kushtuar Ditëve Evropiane të Trashëgimisë Kulturore. Në këtë lidhje është organizuar një konferencë shkencore ndërkombëtare me temë “Zanatet popullore – e kaluara, e tanishmja dhe e ardhmja”. Në të do të marrin pjesë 37 specialistë etnografë dhe historianë nga shteti dhe nga jashtë.

“Ne jemi shumë të lumtur, sepse Ministria e Kulturës e ka zgjedhur pikërisht tubimin tonë për t’ua kushtuar këtyre ditëve evropiane të kulturës – tha zonja Bozhinova. – Mendoj se njerëzit gjithnjë e më shumë interesohen për zanatet popullore.”

Sipas saj ndër zanatet më kureshtare, që mysafirët e kompleksit “Etëra” do të mund të shihen, janë kukullat tradicionale të përpunuara me dorë, ëmbëlsirat e një pastiçeri italian, ikonat e vizatuara mbi qelq (një zanat karakteristik për Rumaninë, por të panjohur tek ne).

Përgatiti në shqip: Jordanka Ivanova