“S’ka një festë më të madhe sesa festa e trëndafilit” – me këtë moto çdo vit zhvillohet një nga festivalet më të bukura, më të shumëngjyrëshe dhe më të gëzueshme në Bullgari – ajo e Trëndafilit. Historia e saj në qytetin Kazanllëk (Bullgari Qendrore) tashmë është më se 100 vjeçare. Në javën e parë të qershorit me një rit të posaçëm fillon mbledhja e trëndafilave në Luginën e Trëndafilave, siç është i njohur rajoni i qyteteve Kazanllëk dhe Karllovo.
Ky është një nga vendet më romantike të Bullgarisë. Po të shkoni atje në mes të majit do të shikoni fushat e mëdha me trëndafila, do të ndieni aromën e lules më të bukur, do t’ju magjepsin këngët e mbledhësve. Lugina e trëndafilave, qyteti Kazanllëk dhe trëndafili janë simbolet delikate të Bullgarisë, të cilat i frymëzojnë pa masë artistët dhe zejtarët tanë, të cilat dallohen në krijimtari dhe në traditat tona popullore. Trëndafilin mund ta dalloni në qëndisjet tradicionale, në legjendat e vjetra, bile në muzikë dhe në kërcime.
Nga lulet e mbledhura në Luginën e Trëndafilave prodhohet vaji bullgar i trëndafilit i shquar në tërë botën. Për shkak të aromës së tij të këndshme ai përdoret në parfumeri, nganjëherë edhe në prodhimtarinë farmaceutike. S’ka një lule më të shtrenjtë sesa trëndafili, pohojnë njerëzit në Kazanllëk dhe tregojnë se plantacionet e trënd afilit këtu japin bukën e gojës të vendasve prej shumë kohësh. Me kalimin e viteve fillimi i mbledhjes së trëndafilave u shndërrua në një festë unike plot me rite të veçanta, muzikë dhe kërcime. Lulet mblidhen me dorë, shumë herët në mëngjes dhe kështu ato mbeten të freskëta – për ta ruajtur sa më gjatë aromën dhe pastaj ajo të nxirret me anë të distilimit.
Mbledhja e trëndafilave në Kazanllëk tërheq turistë nga tërë bota. Interes më të madh provokon zierja e rakisë prej trëndafilave. Prezantohen rite autentike dhe tradicionale, gatuhen gjellët tipike për këtë rajon, si për shembull pite me reçel trëndafili, llokum, byreqe. Kulmi i festave është karnavali, i cili organizohet të dielën e parë të qershorit. Në të marrin pjesë jo vetëm njerëz me maska, por edhe ansamble folklorike, motoçiklistë etj. nga rajone të ndryshme të shtetit.
Çdo vit Kazanllëku është plot me mysafirë, të cilët vijnë posaçërisht për festivalin e pranverës. “Akoma gjatë shkurtit shesim biletat për paradën festive, që zhvillohet të dielën e parë të qershorit – tha Srebra Kaseva nga bashkia e qytetit Kazanllëk. – Parada e karnavalit është një traditë shumëvjeçare, mirëpo ne gjithmonë përpiqemi të shtojmë tek ajo diçka të re. Në të marrin pjesë përfaqësues të kopshteve të fëmijëve, shkollave, vatrave të kulturës dhe të gjitha organizatave kulturore të qytetit. Ata vetë përpunojnë kostumet e tyre. Marrin pjesë gjithashtu mysafirë nga qytetet e binjakëzuara të Kazanllëkut. Në kuadrin e tri ditëve në një skenë në ambient të hapur zhvillohet Festivali Folklorik Ndërkombëtar me mysafirë ballkanikë. Pjesëmarrësit në të gjithashtu bëhen pjesë e paradës festive. Zakonisht ajo mbledh më se 30 mijë veta. Vitin e kaluar shikuesit ishin 70 mijë. Ata kalojnë 5-6 kilometra – nga njëri në tjetrin skaj të qytetit. Mendoj se kjo është parada më e madhe që organizohet në Bullgari. Më parë mysafirët tonë ishin kryesisht nga Japonia, Kina dhe nga shtetet-fqinje, mirëpo vitin e kaluar erdhën shumë turistë nga Italia, Gjermania, Rusia. Për ne ky është një stimul për t’i organizuar festat sa më mirë. Është një përgjegjësi e jashtëzakonshme – prezantojmë Luginën e Trëndafilave në këtë ngjarje të madhe për turizmin bullgar.”
Përgatiti në shqip: Jordanka Ivanova
Fotografi: BNR, BGNES
Në Bullgari ka më shumë se 5 mijë shpella, secila më misterioze dhe e paarritshme, secila me historinë, bukurinë dhe misteret magjepsëse. Disa nga këto thesare të vërteta nëntokësore janë të rregulluara dhe mirëpresin turistët. Ju sjellim..
Ofertat e pronave për pushime në Bullgari janë rritur me 30-40% në tre vitet e fundit. Aktualisht numri i tyre i kalon 20 mijë. Gjithnjë e më shumë klientë preferojnë të marrin me qira një apartament apo edhe një shtëpi të tërë gjatë pushimeve të..
Sofja raporton një rritje prej 7% të numrit të turistëve për gjysmën e parë të 2024. Rritja është 15% sipas bazës vjetore për vitin 2023, me trafik turistik madje mbi nivelet e para Covid-19. Këto të dhëna optimiste e kanë motivuar administratën e..