Konferenca rinore evropiane, e cila u zhvillua para disa ditësh në Sofje, është një aktivitet i madh, i organizuar si një platformë për dialog mes të rinjve nga Ballkani Perëndimor dhe Partneriteti Lindor dhe njerëzve në poste udhëheqëse politike nga qeveria bullgare, Komisioni Evropian dhe OKB-ja. Atje morën pjesë mbi 250 përfaqësues të rinj nga 40 shtete në BE dhe çdo prej tyre kishte mundësi për të bërë pyetje mbi tema më të ndryshime. Gjatë hapjes së konferencës u bë e qartë se Presidenca Bullgare e Këshillit të BE-së është e para, e cila i vendos njerëzit e rinj dhe të ardhmen e Evropës në qendër të prioriteteve të veta.

Si rezultat i punës së përbashkët të delegateve në kuadrin e forumit dyditor u krijuan 11 qëllime evropiane për rininë. Ministri i Rinisë dhe Sportit Krasen Kralev i shpalli qëllimet:

“Evropa e qëndrueshme dhe e gjelbër, informacion dhe dialog konstruktiv , barazi mes sekseve, ndërlidhje e Evropës me të rinjtë, punësim dhe arsim cilësor për të gjithë. Të punohet në interesin e të rinjve në rajonet e shpopulluara, për përmirësimin e shëndetit psikik dhe mirëqenies së të rinjve, si dhe për përfshirjen e grupeve të prekura dhe të një rrethi më të gjerë prej njerëzish në proceset e marrjes së vendimeve të rëndësishme. Duke marrë pjesë në këtë konferencë Partnerët nga BE-ja dhe OKB-ja shprehën mirënjohjen e vet ndaj Presidencës Bullgare në përpjekjet e tyre për zhvillimin e politikave për të rinjtë në plan botëror. Unë besoj se pas përfundimit të Presidencës Bullgaria do të luajë një rol kyç në sektorin e rinisë. Presidenca Bullgare shtroi akoma dy çështje sa i përket sektorit “politikat rinore” dhe ato janë për pjesëmarrjen e të rinjve në ndërtimin e një shoqërie të qëndrueshme dhe tema për krizën demografike. Një nga prioritetet e Presidencës Bullgare është ndalimi i largimit nga vendi të njerëzve të arsimuar me kualifikim të lartë pune. Për këtë qëllim ka nevojë për sigurimin e një arsimi më cilësor gjatë 2-3 viteve në vijim, si dhe për sigurimin e vendeve më atraktive të punës dhe të të ardhurave më të mira.”

Mu para hapjes zyrtare të konferencës, ku mori pjesë edhe Kryeministri Bojko Borisov, u zhvillua një dialog me Komisionarin Evropian të Arsimit, Kulturës, Rinisë dhe Sportit Tibor Navraçiç dhe me të dërguarin e posaçëm të OKB-së për çështjet rinore Xhajatma Uiknamaranjake. Sipas fjalëve të komisionarit Navraçiç, BE-ja duhet të përqendrohet te sfidat e lidhura me të rinjtë – si papunësia, ose niveli i ulët i pjesëmarrjes në politikën ndër të rinjtë, ekstremizmi dhe radikalizimi. Ja se çfarë tjetër tha ai:

“Ky takim ishte shumë i dobishëm, që të dëgjohen idetë e pjesëmarrësve, që të diskutojnë të rinjtë dhe të përhapin idetë tyre në politikën e së ardhmes. Do të vazhdojmë t’i diskutojmë këto tema edhe gjatë gjysmës së dytë të vitit. Gjatë Presidencës Austriake të Këshillit të BE-së gjithashtu do të ketë mundësi të mira për dialog. Është parashikuar një konferencë me ministrat, të cilët përgjigjen për rininë në shtetet evropiane. Gjatë këtij takimi pjesëmarrësit nga Forumi i Sofjes do të mund të bëjnë pyetje konkrete, për të cilat interesohen.”

Përgatiti në shqip: Vesella Mançeva